Bien paditë ndaj tatimeve – Në tetor, 394 kompani në gjykata, 70 biznese të mëdhenj
Ka shënuar një rënie me 7.5% numri i gjyqeve të bizneseve kundër administratës tatimore. Nga 426 përplasje në muajin korrik, aktualisht totali i padive kundër tatimeve ka rënë në 394. Shkak i rënies është pjesërisht amnistia fiskale që ka nisur nga gjysma e këtij viti, ashtu si dhe rinisja e punës së gjykatave në shtator.
Gjithsesi mbetet shumë i lartë numri i bizneseve të mëdha që kanë ngritur padi ndaj Drejtorisë së tatimpaguesve VIP. Mes 70 padive të bizneseve të mëdhenj bien në sy disa prej kompanive me mjaft peshë në jetën ekonomike të vendit.
Ato i kërkojnë Gjykatës shfuqizimin e gjobave të kripura prej miliona lekëve, apo rimbursimin e detyrimeve të vjelura pa të drejtë nga tatimet.
Një prej kompanive kërkon shfuqizimin e gjobave dhe kamatvonesave të cilat në total arrijnë 9 milionë lekë, ndërkohë që një tjetër kërkon rimbursimin e tatimit në burim në shumën 16.5 milionë lekë, afërsisht 150 mijë dollarë.
Gjysma e parë e vitit 2017 shënoi një bum padish nga bizneset kundër administratës tatimore.
Lorenc Rabeta/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.