Bien pagat – INSTAT: Paga mesatare në vitin 2016, 45,800 lekë

Paga mesatare në ekonomi pësoi një rënie të papritur gjatë vitit 2016. Mbështetur në të dhënat e INSTAT, paga mesatare bruto për vitin e kaluar zbriti në rreth 45,800 lekë, në rënie me 2.1% krahasuar me një vit më parë.

Niveli i pagës mesatare në ekonomi u godit sidomos nga rënia në degët e industrisë nxjerrëse, transportit dhe në disa prej degëve të shërbimeve.

Viti i kaluar ishte sfidues për industrinë nxjerrëse, çka u reflektua me një rënie prej 6.7% të pagës mesatare, ndërsa në sektorin e transportit, rënia ishte 7.3%.

Edhe për ata sektorë ku pagat janë rritur, përgjithësisht rritja ka rezultuar e zbehtë. Përjashtim bëjnë vetëm sektori i energjisë, me 8.7% apo ai i shërbimeve profesionale me 11.6%.

Në vlerë absolute, pagat më të larta në ekonomi edhe vitin e kaluar i kishte aktiviteti i organizatave ndërkombëtare, me 124 mijë lekë në muaj.

Për sa i takon ekonomisë shqiptare, sektori me pagën mesatare më të lartë është ai i shërbimeve financiare, me 98 mijë lekë në muaj dhe informacioni e komunikimi me 71 mijë lekë në muaj.

Ndërkohë, pagën mesatare më të ulët e kanë ata sektorë që mbajnë edhe peshën më të lartë në punësim, si bujqësia, industria përpunuese apo aktiviteti i bar-restoranteve.

INSTAT e llogarit pagën mesatare mbështetur në të dhënat e Drejtorisë së Përgjithshme të Tatimeve, ndaj duhet konsideruar edhe një shmangie e shifrave që lidhet me informalitetin, po të kemi parasysh se një pjesë e mirë e pagave nuk deklarohen të plota.

Megjithatë, tendenca në vitet e fundit është qartësisht drejt uljes së nivelit të informalitetit, ndaj nuk besohet se mund të ketë qenë ky faktori më përcaktues në uljen e pagës mesatare.

Megjithëse rritja e ekonomisë shqiptare është në përmirësim, kjo rritje ende nuk po reflektohet në mënyrë të njëtrajtshme në të gjithë treguesit makroekonomikë.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.