Bien pagesat në pos, rritet homebanking – Tranzicioni drejt pagesave alternative, të dhënat e shkurtit
Të dhënat më të fundit nga Banka e Shqipërisë sa i përket sistemeve të pagesave, tregojnë se transaksionet në vlerë nëpër terminalet POS, kanë pësuar një rënie gjatë muajit shkurt, krahasuar me muajin e parë të vitit. Kështu, shifrat tregojnë se pagesat nëpërmjet këtyre terminaleve gjatë shkurtit kanë qenë në 2.03 mld lekë, nga rreth 2.26 mld lekë që ishin gjatë muajit janar. Sa i përket numrit të transaksioneve ndërkohë, regjistrohet një rritje e lehtë, në rreth 548 mijë, nga 532 mijë që ishin në muajin janar.
Pagesat nëpër terminalet POS, pra pagesat me kartë, cashless, direkt te subjekti, shihen gjerësisht si një ndër treguesit më të besueshëm të tranzicionit drejt pagesave alternative, pa para fizike. Kjo strategji tashmë është edhe ndër objektivat kryesorë të Bankës së Shqipërisë, duke qenë se vendi ynë është ndër ata me përdorimin më të lartë të parasë fizike. Tranzicioni drejt parasë elektronike do të sillte ulje të ndjeshme të kostove në ekonominë tonë, të cilat sipas vetë bankës vlerësohen deri në 2% të Prodhimit të Brendshëm Bruto.
Një tjetër tregues që mat këtë tendencë është edhe ai i përdorimit të homebanking, pra të kryerjes së veprimeve të transaksioneve bankare nëpërmjet platformave online. Shifrat tregojnë se gjatë shkurtit, vlera e transaksioneve të kryera nëpërmjet homebanking ka qenë 10.9% më e lartë se muaji janar. Në numër transaksionesh ndërkohë, vihet re një rënie prej 7.9%.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.