Bilanci i aksidenteve – Më pak këtë vit, por 137 njerëz kanë humbur jetën

137 njerëz kanë humbur jetën nga aksidentet rrugore në tetë muajt e parë të këtij viti. Instituti i Statistikave raporton se këtë vit numri i të vdekurve është më i ulët krahasuar me të njëjtën periudhë të një viti më parë, por sërish shifrat japin një tablo të përmasave dramatike. Në veçanti, këtë vit vërehet një rritje e ndjeshme e femrave që kanë humbur jetën nga aksidentet rrugore.

Numri i aksidenteve rrugore këtë vit ka qenë më i ulët, përfshi sezonin veror, që është edhe periudha e vitit me rrezik më të lartë për ngjarje të tilla. Në tetë muaj, në Shqipëri u regjistruan rreth njëmijë aksidente, 12% më pak krahasuar me të njëjtën periudhë të vitit të kaluar.

Nëse Instituti i Statistikave raporton shifra më të ulëta të aksidenteve rrugore, dëmi ekonomik i tyre vazhdon të rritet. Dëmet e aksidenteve ngelen shpenzimi kryesor për kompanitë e sigurimeve në vend. Për shtatë muajt e parë të vitit, në klasat e sigurimit të detyrueshëm motorik dhe në sigurimin kasko të mjeteve tokësore u paguan pothuajse 1.7 miliardë lekë dëme. Nëse shtojmë edhe dëmet e paguara për Fondin e Kompensimit, shifra totale arrin në mbi 2 miliardë lekë ose rreth 16 milionë euro vetëm për pjesën e parë të vitit. Krahasuar me 7-mujorin e parë të vitit të kaluar, vlera e dëmeve të lidhura me aksidentet rrugore është rritur me 4%.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.