Bilanci i energjisë për 6-mujorin – 52% energjisë, nga HEC-et private, bien humbjet në rrjetin e shpërndarjes
Rreth 2.7 milion mwh energji u prodhua gjatë 6-mujorit të parë të këtij viti nga të gjithë burimet gjeneruese në vend, teksa hidrocentralet private dominuan prodhimin me 52% të sasisë totale. Sipas të dhënave të raportuara nga Enti Rregullator i Energjisë, hidrocentralet publike të Kaskadës së Drinit prodhuan rreth 1.31 mln mwh energji apo 48% të totalit të energjisë së gjeneruar. Gjatë muajit mars të këtij viti nisi prodhimin dhe hidrocentrali i Moglicës, duke gjeneruar për periudhën 4-mujore 52.7 mwh energji apo 2% të totalit.
Paralelisht ka vijuar edhe prodhimi i energjisë nga centralet fotovoltaike, ndonëse sasia e gjeneruar është tejet e ulët në raport me energjinë e prodhuar nga burimet hidrike. Në total këto impiante prodhuan 15,882 mwh energji, duke treguar se diversifikimi i burimeve të prodhimit të energjisë është ende larg, për sa kohë 2 projektet për ndërtimin e parqeve fotovoltaike në Karavasta dhe Akërni nuk kanë nisur ende. Ndërkaq, konsumi total i energjisë për 6-mujorin arriti në rreth 3.76 mln mwh energji, duke bërë që nevojat konsumatore të plotësohen përmes importit.
Ndërkaq, niveli i humbjeve në rrjetin e shpërndarjes për 6-mujorin arriti në 22.84%, duke shënuar një përmirësim në raport me të njëjtën periudhë të vitit të kaluar, ku humbjet përllogariteshin në 23.72%. Edhe niveli i arkëtimeve ka një tendencë në rritje gjatë muajit maj dhe qershor, në raport me muajt e karantinës, ku u shënua një rënie e ndjeshme e pagimit të faturave të energjisë elektrike. Për 6-mujorin, niveli I arkëtimeve arriti në 94.3% e totalit të faturave të gjeneruara nga OSHEE.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.