“Bilanci” i tërmeteve- Rama: Bëni hartën e dëmeve, Xhaçka: Do dëmshpërblehen
Pas tërmetit me magnitudë 5.8, dhjetra lëkundje të tjera me intensitet më të ulët kanë goditur vendin. Ndërkohë që, kryeministri Edi Rama ka zhvilluar një takim me përfaqësues të Ministrisë e Mbrojtjes, asaj të Brendshme, drejtues te Forcave të Armatosura dhe prefektët për situatën post-tërmet, ku kërkoi gatishmëri për përballimin e situatës si dhe evidentimin e të gjitha dëmeve në terren, ndërsa ministrja e Mbrojtjes Olta Xhaçka ka premtuar dëmshpërblim për të gjithë.
Prefektët e Tiranës dhe Durrësit bënë me dije të dhënat paraprake, ku qindra banesa janë dëmtuar si pasojë e lëkundjeve të forta.
Sipas Ministrisë së Shëndetësisë, në spitalin e Traumës, QSUT dhe në Spitalin e Durrësit kanë marrë shërbim mjekësor 105 qytetarë të lënduar nga tërmeti, kryesisht me dëmtime të shkaktuara nga rrëzimet apo goditjet.
Pjesa më e madhe e pacientëve kanë lënë spitalet, ndërkohë që stafi mjekësor është në gatishmëri të plotë. Ministria e Shëndetësisë ka vënë në zbatim planin e gatishmërise për rastet e emergjencave.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.