“Bilanci” i të ardhurave të 2017– Në buxhet, 23 miliardë lekë më shumë se 2016! Tatim-fitimi dhe sigurimet tejkalojnë planifikimet
Të ardhurat në buxhetin e shtetit për vitin 2017 arritën rreth 430 miliardë lekë, duke shënuar një rritje me 23 miliardë krahasuar me vitin 2016. Në përqindje rritja e vitit 2017 rezulton 5.7 % më shumë se 2016.
Sipas statistikave zyrtare të botuara nga Ministria e Financave dhe Ekonomisë, në terma vjetorë, të ardhurat e përgjithshme për 12 mujorin 2017 ishin parashikuar në vlerë 442 miliard e 901 milion lekë, një objektiv që është realizuar në masën 88.2 % për faktin se diferenca e realizimit është minus 12 miliard e 504 milion lekë nga plani.
Të ardhurat tatimore
Gjatë vitit 2017, të ardhurat tatimore rezultojnë se janë realizuar në masën 398.6 miliardë lekë; 28.7 miliardë lekë më shumë se 2016 ose 7.8 % më shumë se 2016. Realizimi në këtë rast është në masën 98.3 %.
Të ardhurat nga tatimet e doganat rezultojnë 293 miliardë lekë me një rritje prej 17.6 miliard lekësh krahasuar me vitin 2016.
Pavarësisht se krahasuar me të ardhurat e vitit 2016, gjatë vitit 2017 është shënuar rritje, krahasuar me objektivat, rezulton se ka mosrealizime apo tejkalime të parashikimeve të planit.
Sa i përket të ardhurave nga tatimfitimi dhe nga taksat doganore, realizimi i vitit 2017 ka tejkaluar planin.
Të ardhurat nga tatim-fitimi rezultojnë gjatë vitit 2017 në vlerë 31,6 miliardë lekë( 2.4 miliardë lekë më shumë nga sa ishin planifikuar). Ndërsa nga taksat doganore, të ardhurat rezultojnë 6.4 miliardë lekë (91 milion lekë më shumë sa ishte planifikuar për vitin 2017).
Po ashtu, me tejkalim të planit rezultojnë edhe të ardhurat nga sigurimet shëndetësore e shoqërore, ku arkëtimet janë me 3 % dhe 2.4 % më shumë sesa ishte planifikuar në fillim të vitit 2017.
Ndërkohë, zërat me mosrealizimin më të madh në krahasim me planin (në përqindje) e kanë të Ardhurat nga Ndihmat (-14.7% krahasuar me planin 2017), Tatimi mbi të Ardhurat Personale (-11.3 % krahasuar me planin 2017), Taksa mbi Biznesin e Vogël (-38% krahasuar me planin 2017), Të ardhura për kompensim në vlerë te pronarëve (-40.3% krahasuar me planin 2017)
Të ardhurat jotatimore
Të ardhurat jotatimore gjatë vitit 2017 rezultojnë 20,6 miliard lekë, duke shënuar jo vetëm mosrealizim nga plani i 2017 por edhe rënie krahasuar me vitin 2016. Referuar të dhënave zyrtare, të ardhurat jotatimore janë 1.8 miliardë lekë më pak se në vitin 2016, e mosrealizmi është në masën 3.7 miliard lekë ose -15.2 % krahasuar me planin e vitit 2017.
SCAN Online
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.