Bileta 10 euro për të parë Venecian – Argumentet pro dhe kundër vendosjes së tarifës

Opinioni publik në Venecia për vendosjen e biletës hyrëse për vizitorët është i ndarë, ndërkohë që disa mendojnë se lëvizja do të sjellë përfitim për turizmin vendas dhe të tjerë që argumentojnë  se masa nuk do të trajtojë fluksin gjigant të turizmit në vend.

Kosto e një vizite në Venecia do të jetë 10 euro (11.4 USD) më e lartë  pas vendosjes së biletës hyrëse, që synon të zbusë kostot e lidhura me ardhjen e miliona turistëve çdo vit. Megjithatë,  nuk do të ketë tarifë për banorët e vendit, ata që vizitojnë familjarët dhe miqtë apo njerëzit që studiojnë e punojnë në qytet. Tarifa u propozua për të mbrojtur qytetin, që ka 54,000 banorë të përhershëm dhe pranon 30 milionë vizitorë çdo vit.

Udhëtarët ditorë shihen si barriera kryesore e qytetit antik, pasi rrisin çmimet për pjesën më të madhe të banorëve.  Sipas Mara Manente,  drejtoreshës së Qendrës së Studimeve Ndërkombëtare për Ekonominë e Turizmit në Universitetin e Venecias,  kostot e mirëmbajtjes nuk duhet të barten vetëm nga banorët, por duhet një zgjidhje e drejtë dhe kosto të ndahet nga të gjithë. Persona të tjerë që kanë argumente kundër tarifës, thonë se bileta do të jetë e vështirë të pranohet nga shumë turistë dhe autoritetet lokale duhet të përqendrohen në përmirësimin e shërbimeve publike që të trajtojnë zhvillimin e shpejtë të turizmit.

“Njerëzit do vazhdojnë të vijnë, por do të surprizohen kur të zbulojnë që ka një biletë hyrëse për të parë Venecian.  Qyteti është i mbipopulluar nga turistët, por duhet të ofrohen më shumë shërbime publike në vend” – tha Tatiana, udhërrëfyese për turistët. Persona të tjerë mendojnë se bileta hyrëse do të lehtësojë barrën e Venecias, pasi ata që nuk janë edhe aq entuziast për të vizituar qytetin mund të mos e bëjnë pas prezantimit të tarifës.

“Nëse e përdorim për të larguar turistët që nuk kanë qejf të vijnë, e mbështes propozimin për t’i marrë para shtesë udhëtarëve ditorë” – tha Ludobico, një shitës lokal.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.