Biokarburantet në Kuvend/ Ligji rikthehet për diskutim: 10% e sasisë së konsumuar në vend, karburant i nxjerrë nga biomasa
Pavarësisht se u propozua në vitin 2019, ligji “Për prodhimin, transportimin dhe tregtimin e biokarburanteve” “u harrua” në sirtaret e Kuvendit, teksa së fundmi ai është rikhtyer sërish pë dikutim.
Dokumenti i propozuar është i njëjtë me atë të 2 viteve më parë, duke mos ndryshuar as afatet kohorë për arritjen e objektivëve, që tashmë janë tejkaluar. Sipas tij, nga vitit 2020, 10% e sasisë së karburanteve të konsumura për transport në vendin tonë duhet të përbëhej nga biokarburantet.
Por, teksa në atë kohë ligji u diskutua në komisionet parlamentare, por nuk u votua në seancën plenare, ai është rikthyer për diksutim, ndërsa do të jenë diskutimet e reja që do të përcaktojnë afatet se kur duhet të arrihen objektivët e parashikuar.
Përdorimi i biokarburanteve parashikohet, në kuadër të detyrimeve që ka vendi ynë për energjitë e rinovueshme, si dhe për arritjen e objektivave kombëtare për mbrojtjen e mjedisit dhe shëndetit, zhvillimin e qëndrueshëm të sektorëve të bujqësisë dhe pyjeve si stimul për zhvillimin rural dhe nxitje të punësimit, si dhe uljen e sasisë së emetimeve të ndotësve në ajër dhe të emetimeve të gazeve me efekt serrë, të çliruara në mjedis nga veprimtaritë në sektorin e transportit.
Biokarburantet janë lëndë djegëse për sektorin e transportit që prodhohen nga biomasa, ndërkohë që projektligji i propozuar nga qeveria parashikon prodhimin e tyre brenda vendit ose importin e tij. Sipas dokumentit, kur prodhimi vjetor vendas i biokarburanteve dhe i lëndëve të tjera djegëse, të rinovueshme, nuk mbulon të gjithë sasinë minimale vjetore, për t’u hedhur në treg, shoqëritë e tregtimit me shumicë që do të pajisen me licencat përkatëse detyrohen të garantojnë furnizimin e tregut me këtë sasi minimale vjetore nëpërmjet importit.
Trajtimi fiskal i prodhimit dhe tregtimit të biokarburanteve do bëhet sipas legjislacionit doganor e tatimor aktual. Por, ndërkohë gjatë diskutimeve të para 2 viteve kompanitë që operojnë në tregun hidrokarbur kërkuan një trajtim fiskal të veçantë për biokarburantet si dhe subvencione për bujqësinë eqë do të kulitvojë bimët që shërbejnë për prodhimin e këtij lloj karburanti, me qëllim reduktimin e çmimit dhe stimulimin e konsumit.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.