Bisedimet për koalicion në Gjermani – Mospërputhje mbi kujdesin shëndetësor dhe politikat e tregut të punës

Kancelarja gjermane Angela Merkel tha se konservatorët e saj po përballen me negociata të ashpra me social demokratët, ndërkohë që po përpiqen të formojnë koalicionin qeverisës.

Ekonomia më e madhe e Europës ndodhet në një “ngërç” politik, gjë që po shkakton shqetësime te investitorët dhe vendet partnere se vendimet politike mbi çështje të rëndësishme si dalja e Britanisë dhe reformat e eurozonës, mund të vonohen.

“Nuk është ende e mundur për të thene se sa do të zgjasë kjo periudhë, ne kemi bërë progres gjatë fundjavës por mbeten ende çështje të rëndësishme që duhet të zgjidhen”, tha Merkel.  Partitë arritën në dakordësi mbi energjinë dhe bujqësinë ditën e Shtunë, por kanë ende mospërputhje në lidhje me kujdesin shëndetësor dhe politikat e tregut të punës.

Lideri i partisë Social Demokrate, Martin Schulz, tha se të dyja palët kanë bërë progres në shumë çështje, por mbeten ende në konflikt mbi kërkesën e partisë së tij për të hequr kontratat me afat të caktuar për punëtorët dhe mbi thirrjet e tij për të zëvëndësuar sistemin publik-privat të kujdesit shëndetësor me një sistem të vetëm të sigurimit për të gjithë.

Kujdesi shëndetësor dhe politikat mbi tregun e punës janë të rëndësishme për partinë Social-Demokrate, ku shumë anëtarë kundërshtojnë formimin e një partneriteti të ri me Merkel, duke marrë parasysh rezultatin famëkeq në zgjedhjet e Shtatorit.

Konservatorët e Merkel kanë refuzuar thirrjet e social demokratëve për të dyja çështjet, duke thënë se duhet fokusuar në përmirësimin e kujdesit shëndetësor publik, si ndryshimin e rregullave të faturimit nga doktorët, që fitojnë më shumë duke trajtuar pacientë privatë.

Mbi politikat e tregut të punës, blloku i Merkel kërkon parandalimin e rinovimit të përsëritur të këtyre kontratave.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.