Bitcoin kalon përsëri 1 trln dollarë. Kriptovaluta është rritur me 80% për këtë vit. Tregtohet në 54,358 USD

Vlera e Bitcoin kaloi 1 trilionë dollarë, ndërkohë që çmimi i kriptovalutës pësoi rritje. Bitcoin u rrit me 7% në sesionin tregtar të ditës së Martë, duke prekur 54,358 dollarë, sipas CoinDesk. Kjo është hera e dytë që vlera e të gjithë bitcoin në qarkullim kalon 1 trilionë dollarë, pasi e preku për herë të parë këtë kufi më 19 Shkurt.  Kapitalizimi i kriptovalutës qëndroi sipër 1 trilionë dollarëshit atëherë për pak ditë, përpara se të binte.

Edhe pse bitcoin po tërhiqet nga niveli më i lartë i të gjitha kohërave prej 58,332 dollarë,  kriptovaluta ka performuar mirë.  Monedha është në rritje me 80% këtë vit dhe 570% në 12 muajt e fundit. Performanca e Bitcoin është shpjeguar nga disa faktorë, përfshirë pjesëmarrjen e investitorëve të mëdhenj institucionalë dhe disa blerje të famshme nga korporatat.  Tesla, Square dhe Microstrategi, janë ndër kompanitë që kanë blerë bitcoin.  Ditën e Diel,  një aplikacion kinezë bëri të ditur se ka blerë jo vetëm bitcoin, por edhe ethereum.  Ether, një kriptovalutë që funksionon me rrjetin Ethereum, tregtohej në 1,836 dollarë, në rritje me 7%, sipas CoinDesk.

Disa mbështetës të bitcoin, e quajnë monedhën si një “ar dixhital”, një mbrojtje kundër inflacionit dhe aktiv të sigurtë ku investitorët mund të “parkojnë”  paratë, në periudha të trazirave politike.  Disa të tjerë argumentojnë se politikat lehtësuese monetare nga bankat qendrore në botë po gërryejnë vlerën e valutave me vlerë  ligjore,  si dollari amerikan, dhe bitcoin ofron një alternativë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.