Biznes në dogana – Sipërmarrjet mund të përdorin zonat e lira, kriteret që duhet të plotësojnë
Sipërmarrjet shqiptare mund të përdorin territore doganore për të të kryhet çdo aktivitet industrial, tregtar ose shërbimi.
Përmes një vendimi të botuar në Fletoren Zyrtare, për këtë qëllim qeveria ka vënë në dispozicion “zonat e lira doganore” të cilat funksionojnë sipas legjislacionit doganor. Çdo person juridik, i vendosur në Republikën e Shqipërisë, mund të aplikojë për veprimtari në një zonë të lirë doganore, me kusht që të përmbushë kushtet si dhe detyrimet e përcaktuara në legjislacionin në fuqi.
Autorizimi për veprimtari në zonë të lirë doganore miratohet pas plotësimit të disa kushteve dhe kritereve si: përdorimi nga aplikuesit i sistemeve kompjuterike të përpunimit të të dhënave për paraqitjen e deklarimeve dhe njoftimeve doganore elektronike, në sistemin informatik të doganës apo në sisteme specifike të krijuara për këtë qëllim; Përdorimi i sistemeve të monitorimit me videokamera dhe i ndriçimit; Vendosja në dispozicion të autoriteteve doganore të ambienteve të punës; Rrethimi i zonës së lirë doganore; si dhe aplikuesit nuk duhet të detyrime doganore të papaguara dhe të kenë kryer shkelje penale në fushën doganore dhe të akcizës për një periudhë 5 (pesë)-vjeçare nga data e aplikimit.
Edhe pas marrjes së autorizimit, sipërmarrjet duhet të përmbushin një sërë kushtesh në vazhdimësi, ndërsa në rast të shkeljes së tyre mund të penalizohen me anulim të autorizimit.
Elisabeta Dosku/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.