Bizneset italiane, të shtyhet afati – Confindustria: Nuk mbledhim dot në kohë të dhënat për pronarët përfitues, shkak Pandemia
Ndërsa Qendra Kombëtare e Biznesit ka vendosur fundin e marsit si afatin e fundit për regjistrimin e pronarëve përfitues, Confindustria Albania i kërkon Ministrisë së Financave shtyrjen e afatit për shkak të vështirësive që ka sjellë Pandemia Covid 19.
Në letër, Confindustria Albania vë në dijeni autoritetet Shqiptare se është në dijeni të Ligjit nr. 112/2020 dhe VKM pasuese n.1088/2020, me të cilën ligjvënësi shqiptar i është përshtatur me legjislacionit evropian për pastrimin e parave, duke krijuar një regjistër për pronarët përfitues dhe ka ndërmarrë menjëherë masa për të informuar anëtarët e saj, në mënyrë që të gjitha palët e interesuara (midis tyre edhe vetë Confindustria Albania) të jenë në përputhje me kërkesat e këtij ligji brenda afateve të përcaktuara.
Por, vazhdon në letër shoqata italiane, në kushtet e kufizimeve të shumta të vendosura në Shqipëri dhe jashtë saj, për shkak të situatës së krijuar prej Covid- 19, pavarësisht se investitorët e huaj do të përpiqen të
përmbushin detyrimet ligjore brenda 60 ditëve (duke filluar nga 2 hkurti 2021) ne nuk përjashtojmë mundësinë e vonesave për shkaqe të ndryshme që s’varen nga biznesi. Për më tepër, periudha e përcaktuar në këtë ligj përkon me një periudhë të ngarkuar për drejtuesit e bizneseve, sepse është sezoni i mbylljes dhe deklarimit të pasqyrave financiare dhe auditimit.
Për sa më sipër, kërkojmë me mirësjellje që Ministria të rishikojë disa nga afatet e përcaktuara me ligj. Më konkretisht, ne do të kërkojmë që:
– Të shtyhet afati i regjistrimit në regjistrin e pronarëve përfitues deri në 30 Qershor, në mënyrë që t’u jepet mundësia të gjithë investitorëve të huaj të përmbushin detyrimet ligjore, pa u ndëshkuar me gjoba të rënda në këtë moment aspak të favorshëm për likuiditetin e sipërmarjes.
Po ashtu, Confindustria Albania i kërkon Ministris së Finacave Të zgjatet vlefshmëria e dokumentave me origjinë të huaj deri në 90 ditë. Teknikisht është e vështirë që një kompani ndërkombëtare të pajiset me dokumentacionin voluminoz në vendin e origjinës, ta apostilojë, ta përkthejë zyrtarisht në gjuhën shqipe dhe ta noterizojë në afatin kohor prej 30 ditësh, thekson në letër Confindustria Albania.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.