Bizneset kosovare hasin vështirësi për t’u zgjeruar – Kërkojnë mbështetje financiare shtesë
Sipërmarrja në Kosovë po zhvillohet me ritme të ngadalta, pa mundur të krijojë vende pune shtesë dhe të shtyjë përpara ekonominë. Të dhënat vijnë nga anketa e Odës Ekonomike të Kosovës, e zhvilluar me rreth 100 ndërmarrje, 7 banka dhe 6 institucione mikrofinanciare.
62% e mikrobizneseve tregojnë se nuk kanë mundur të shtojnë numrin e të punësuarve në tre vitet e fundit. Sakaq edhe ndërmarrjet e vogla hasin vështirësi në zgjerimin në këtë drejtim. Vetëm 64% e tyre kanë arritur të shtojnë punonjës në 3 vite, por ky shtim ka qenë kryesisht me 1 deri në 3 punëtorë të rinj.
Bizneset fajësojnë mungesën e stimulimit dhe mbështetjes financiare, si nga shteti, ashtu edhe nga institucionet kredidhënëse. 67% e kompanive të vogla përmendën gjithashtu domosdoshmërinë për trajnime specifike të stafit të tyre.
Mungesa e fondeve për të investuar ka detyruar shumë biznese të qëndrojnë informale duke gjetur si kreditorë vetëm institucionet mikrofinanciare. Ndërsa bankat zgjedhin të përkrahin vetëm sipërmarrjet formale.
Të pyetura për sfidat që pengojnë rritjen e biznesit të tyre, ndërmarrjet kishin prioritete të ndryshme sipas madhësisë. Kështu, për bizneset e mesme vështirësia kryesore qëndron në gjetjen e stafit të kualifikuar dhe menaxherëve me përvojë.
Për sipërmarrjet e vogla është kostoja e prodhimit sfida kryesore dhe janë ankuar shpeshherë për faktorët që ndikojnë në këtë kosto, siç është tarifa e lartë e energjisë elektrike.
Sa i takon mikrobizneseve, ato duket se hyjnë në treg pa studiuar më parë kërkesat, pasi sfida kryesore sipas anketës për 1/3 e këtyre sipërmarrjeve është gjetja e konsumatorëve.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.