Bizneset kosovare “shpërthejnë” kundër autoriteteve shqiptare: Tentativa për dëmtim të imazhit të produkteve dhe ndërmarrjeve kosovare

Oda Ekonomike e Kosovës ka reaguar përmes një komunikate për shtyp, ndaj padrejtësive, sipas bizneseve kosovare, që u bëhen nga autoritetet e Republikës së Shqipërisë, sidomos në stinën e verës.

Pavarësisht se Shqipëria përfiton rreth 600 milionë euro nga turistët kosovarë dhe tregtia, sipas OEK, ka një politikë diskriminuese ndaj prodhimeve “Made in Kosova”.

“Në nivele të ndryshme të administratës, sidomos në sezonin e verës, krijojnë barriera të paprecedenta jo-tarifore, për të penguar dhe dobësuar aftësinë konkurruese të produkteve kosovare në tregun e Shqipërisë, sidomos për brendet kosovare që janë të mirëpritura në çdo treg, siç është rasti me birrën, miellin, djathin, qumështin, patatet, verërat dhe produktet tjera. Kjo është edhe më shqetësuese nga një qasje negative ndaj turistëve kosovarë duke i trajtuar dhe keqtrajtuar si të pa dëshiruar dhe të nënvlerësuar në krahasim me turistët tjerë nga rajoni dhe më gjerë”, thuhet në njoftim.

Këto barriera mund të vijnë në formën e çmimeve referente, burokracisë, apo inspektimeve dhe procedurave që tentojnë të njollosin kompanitë kosovare që eksportojnë në Shqipëri.

OEK bën apel për të ndryshuar këtë përqasje të Kosovës si ekonomi konkurrente.

“Vendet e shumta në Europë dhe më gjerë i bashkon ekonomia dhe bashkëpunimi ekonomik prandaj të eliminojmë patriotizmin folklorik dhe tentativën për të hijeshuar të kaluarën duke e dëmtuar dhe anashkaluar rëndë ndërtimin e ardhmërisë e cila duhet të fuqizohet me bashkëpunim ekonomik në forma të avancuara dhe moderne”, përfundon njoftimi për shtyp.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.