Bizneset në Mbretërinë e Bashkuar – Fitimet më të ulëta në gjashtë vite, ndikon Brexit
Bizneset britanike raportuan se gjatë tre muajve të fundit kanë pasur rritjen ekonomike më të dobët.
Shkaku mbetet pasiguria dhe frika nga një Brexit pa marrëveshje si edhe rritja e pengesave të tregtisë globale, tha të dielën Konfederata e Industrisë Britanike. Indeksi i aktivitetit të sektorit privat gjatë tre muajve të kaluar ra në -3 në shkurt nga zero në janar. Kjo ishte norma më e ulët që nga prilli 2013, kur Britania ishte ende duke u rikuperuar nga kriza globale financiare. Firmat presin dobësi të ngjashme në tre muajt e ardhshëm, kur Britania të largohet nga Bashkimi Europian pas më shumë se 40 vjet anëtarësimi.
Kryeministrja britanike Theresa May ende nuk ka fituar përkrahjen e parlamentit për një marrëveshje të tranzicionit Brexit megjithëse ajo ka shtruar rrugën për një vonesë të mundshme për Brexit përtej datës së caktuar të 29 marsit. “Gjithnjë e më shumë kompani po tërhiqen për investime dhe ditët e fundit biznesi po bëhet gjithnjë e më problematik “, tha një studiues kryesor i CBI, Rain Neëton-Smith.
Banka e Anglisë parashikon se ekonomia e Britanisë do të rritet me vetëm 0.2 për qind në tre muaj deri në mars dhe rritja në vitin 2019 do të jetë më e dobëta që nga viti 2009, edhe nëse Brexit shkon mirë. Partnerët tregtarë të Britanisë në Europë po përballen me rritje edhe më të dobët, për shkak të tensioneve tregtare midis Shteteve të Bashkuara dhe Kinës që kanë dëmtuar prodhuesit botërorë. Anketa e CBI u bazua në përgjigjet e 650 bizneseve në sektorin e shitjes me pakicë, prodhim dhe shërbime.
Burimi:Reuters
E.T/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.