Bizneset, në treg të lirë energjie -Pas ankesave për çmimin, ERE ndryshon metodologjinë për faturimin
Pas ankesave të bizneseve që kanë dalë në treg të lirë mbi çmimin e lartë me të cilin e blejnë energjinë nga Operatori i Shpërndarjes së Energjisë Elektrike, Enti Rregullator I Energjisë ka miratuar ndryshimet në metodologjinë e përllogaritjes së tarifimit. Vendimi është miratuar në datën 8 gusht dhe korrekton zbatimin e metodologjisë së përcaktimit të çmimit, për të gjithë faturimet e kryera për gjatë të gjithë periudhës që OSHEE ka ushtruar funksionet si Furnizues i Mundësisë së Fundit për klientët e lidhur në 35 kv. Shqetësimi për çmimin e lartë me të cilin faturohen këto biznese u ngrit fillimisht nga deputeti Ilir Beqaj, gjatë diskutimit të raportit vjetor të ERE-s.
Ndërkohë që rreth 2 javë më pas, kreu i Entit Rregullator, Petrit Ahmeti, premtoi ndryshime në metodologji, duke shtuar se rregullorja e re synon që çmimi të vendoset nga Operatori i Shpërndarjes së Energjisë Elektrike.
Deri më tani vetëm 18 biznese të lidhur në tensionin 35 kv janë shkëputur nga OSHEE, ndërkohë që statistikat flasin për rreth 90 biznese të lidhur në këtë tension. Por, kjo shifër është më e lartë, nëse marrim parasysh faktin se edhe rreth 6000 biznese të lidhur në 20 kv do të kenë detyrimin për ta siguruar vetë energjinë, duke vijuar më tej edhe me kategoritë e tjera, përveç abonentëve familjarë.
Ola Mitre/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.