Bizneset pa furnizues energjie – Asnjë aplikim për Furnizuesin e Mundësisë së Fundit, mbetet kompetencë e FSHU
Furnizuesi i Mundësisë së Fundit për bizneset e liberalizuar që nuk arrijnë të sigurojnë furnizimin me energji elektrike do të mbetet Furnizuesi i Shërbimit Universal, që është një prej kompanive të OSHEE Group. Enti Rregullator i Energjisë, hapi procedurën e përzgjedhjes së një kompanie që do mund të luante këtë rol, në mesin e muajit mars, por në përfundim të afatit të vendosur rezultoi se nuk pati asnjë aplikim nga furnizuesit e licencuar nga ERE.
Në këto kushte, sipas legjislacionit në fuqi këtë rol duhet të luajë furnizuesi publik, që është pikërisht FSHU. FMF është një shoqëri e licencuar për kryerjen e veprimtarisë së furnizimit dhe e ngarkuar me detyrimin e furnizimit të mundësisë së fundit, i cili ofron për një periudhë të kufizuar kohe shërbimin e furnizimit në kushte të rregulluara ndaj klientëve, dhe që i nënshtrohet çmimeve të përcaktuara në përputhje me Metodologjinë e përcaktimit të çmimit të shitjes së energjisë elektrike nga Furnizuesi i Mundësisë së Fundit, të miratuar nga ERE.
Ky shërbim ofrohet kur furnizuesi tjetër ka ndërprerë furnizimin e energjisë elektrike, kur klienti ka shlyer detyrimet ndaj furnizuesit të mëparshëm dhe kur klienti ka dëshmuar pamundësinë e furnizimit me energji elektrike nga furnizues të tjerë. Përcaktimi i tij është tejet i rëndësishëm për të gjithë ato biznese që kanë detyrimin për të zgjedhur vetë furnizuesin e tyre, por që për një sërë arsyesh nuk arrijnë ta sigurojnë atë. Këtu përfshihen edhe rreth 7500 biznese, që dolën në tregun e liberalizuar në datën 1 janar të këtij viti, por që po furnizohen me energji nga FSHU, me një çmim prej 18.8 lekë/kwh apo 7.8 lekë/kwh më të shtrenjtë se çmimi që aplikohej deri në datën 31 dhjetor 2021.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.