Bizneset VIP, debitorët më të mëdhenj te Tatimet – KLSH: Tatimpaguesit e mëdhenj mosrealizim 8,3%, ose në vlerën për 80 milionë dollarë
Auditimi i Kontrollit të Lartë të Shtetit në administratën tatimore gjatë vitit që sapo lamë pas evidenton Drejtorinë e Bizneseve VIP si ndër departamentet me performancë më të dobët kur vjen fjala te realizimi i të ardhurave. Nga auditimi u konstatua se për vitin ushtrimor 2020, të ardhurat tatimore bruto dhe të ardhurat nga kontributet e sigurimeve janë realizuar në masën 235 miliardë lekë, ose në masën 95,5%, nga 246 miliardë lekë i parashikuar fillimisht.
Megjithëse, peshën kryesore në realizimin e të ardhurave e zënë DR Tatimpaguesit e Mëdhenj me një vlerë për 88,7 miliardë lekë ose 38 % të të ardhurave bruto dhe të ardhurave nga kontributet, KLSH konstaton se kjo drejtori paraqet një performancë jo të mirë duke rezultuar me një mosrealizim të planit të të ardhurave në masën për 8,3% ose në vlerën për 8 miliardë lekë, afërisht 80 milionë dollarë.
Ndërkaq, nga auditimi i procedurave të mbledhjes së të ardhurave nga kontributet e sigurimeve shoqërore dhe shëndetësore u konstatua se, nuk kanë performancë të mirë në mbledhjen e të ardhurave Drejtoritë Rajonale Tatimore, Vlorë, Tiranë, Durrës ku konstatohet se, vlera totale e detyrimeve për tu arkëtuar për këtë zë në mbyllje të periudhës 2020, përfaqëson 25-27% të realizimit faktik të ardhurave, e ndjekur nga DRT Shkodër, dhe Lezhë.
Kontrolli i Lartë i Shtetit konkludon se mosarkëtimi i të ardhurave nga kontributet nga ana e DPT-së, për 16,521 milion lekë nga njëra anë përbën të ardhura të munguara për fondin e sigurimeve shoqërore dhe të kujdesit shëndetësor dhe nga ana tjetër pas kësaj shume qëndrojnë një numër i konsiderueshëm punëmarrësish, të cilët në këto kushte nuk mund të përfitojnë nga skema e sigurimeve shoqërore dhe shëndetësore.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.