Biznesi, 5 herë më shumë taksa – Krahasimi i T1 2018 me T1 2017, rritje e ndjeshme e të ardhurave të qeverisë
Biznesi i vogël ka derdhur në formën e taksave ndaj pushtetit vendor plot 183 milionë lekë gjatë 3 muajve të parë të vitit, 5 herë më shumë se e njëjta periudhë e vitit të kaluar.
Treguesit fiskalë të qeverisë për tremujorin e parë evidentojnë kështu se mbledhja e taksave nga biznesi i vogël në formën e taksave ndaj pushtetit vendor është rritur në me 150 milionë lekë në krahasim me të njëjtën periudhë të një viti më parë.
Të dhënat tregojnë kështu se, masa e realizimit të objektivit buxhetor fiksohet tashmë në 61%. Madje, kjo normë është e barabartë me normën e realizimit të këtyre të ardhurave përgjatë të gjithë vitit 2017.
Në rast se ritmi do të vazhdojë, paratë që do të grumbullohen nga biznesi i vogël në fund të vitit do të jenë mbi dy herë më të larta se parashikimi, pra do të kemi një realizim në masën mbi 200%.
Në tre muajt e parë të vitit nga ky zë në buxhet janë mbledhur plot 183 milionë lekë, nga 302 në total që parashikohen në buxhetin e shtetit. Gjatë së njëjtës periudhë të vitit të kaluar, u grumbulluan vetëm 31 milionë lekë, pra rreth 5 herë më pak.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.