Biznesi Italian në Shqipëri – Konfindustria, forum biznesi në shkurt, interes i madh
Konfindustria italiane do të zbarkojë në Shqipëri në datat 18 dhe 19 shkurt me qëllimin e vetëm për të thelluar mundësitë tregtare dhe ato të investimit në vendin tonë. Ndërmarrjet italiane duket se kanë rritur ndjeshëm interesin për Shqipërinë.
Misioni do të udhëhiqet nga zëvendës ministri i zhvillimit ekonomik ndërkohë që eventi është një bashkëpunim i Ministrisë së jashtme, asaj të zhvillimit ekonomik si dhe një sërë shoqatash biznesi dhe tregtie.
Konfindustria dhe biznesi Italian në tërësi vlerëson se, Shqipëria ofron mundësi të shumta biznesi.
Sektorët në fokus të sipërmarrësve italianë janë: energjia, ambienti dhe teknologjia e gjelbër, agroindustria, dhe infrastruktura, së bashku me atë turistike. Disa prej këtyre sektorëve, si energjia, janë vendosur edhe si prioritet i qeverisë shqiptare.
Forumi i biznesit Itali-Shqipëri do të zhvillohet më 19 shkurt të vitit që vjen dhe do të pasohet nga një sërë seminaresh të tjera. Përthithja e investitorëve të huaj në këtë pikë është jetike për Shqipërinë.
Gjatë vitit që vjen, por edhe gjatë viteve në vijim, parashikohet që fluksi i investimeve të huaja direkte në vend të bjerë ndjeshëm, për shkak të përfundimit të projekteve madhore, kryesisht “TAP” dhe “Devolli”. Mosafrimi i projekteve të reja dhe investitorëve të rinj, përkthehet në rënie të ndjeshme të normave të rritjes ekonomike.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.