Biznesi merr më pak kredi – 9.4% më pak për gjysmën e parë të vitit 2018

Kredia e re për biznesin është në rënie edhe gjatë këtij viti. Sipas të dhënave nga Banka e Shqipërisë, në gjashtë muaj sipërmarrjet shqiptare përfituan rreth 89 miliardë lekë kredi nga sistemi bankar. Kjo shumë është në rënie me 9.4% krahasuar të njëjtën periudhë të një viti më parë.

Rënia i detyrohet sidomos tkurrjes së ndjeshme të kredisë së re në sektorë si energjetika dhe ndërtimi, por ndërkohë edhe pjesa më e madhe e degëve të tjera të shërbimeve në ekonomi përfitoi vlera më të ulëta të financimit nga sistemi bankar.

Mes degëve më me peshë, rritje regjistroi tregtia, që ngelet aktiviteti dominues në strukturën e kredisë për ekonominë, si edhe industria përpunuese.

Shifrat tregojnë se kreditimi i biznesit ngelet i ngadaltë dhe kërkesa e shëndetshme nga sektori privat për kredi është ende e zbehtë. Megjithatë, vrojtimet tregojnë se edhe oferta e bankave ngelet e shtrënguar, sidomos për biznesin e madh. Guvernatori, Gent Sejko, në deklaratën e kësaj jave pas mbledhjes së Këshillit Mbikëqyrës, përsëriti edhe njëherë apelin ndaj bankave për një qëndrim më aktiv, edhe në përgjigje të uljes së rrezikut kreditor, reflektuar në rënien e raportit të kredive me probleme.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.