Biznesmenët në emigrim – Në Toskanë, shqiptarët zotërojnë 7564 ndërmarrje
Rajoni i Toskanës në Itali është ai që ka normën më të lartë të sipërmarrjeve me pronar të huaj në vend.
Në të gjithë Italinë ka 600 mijë sipërmarrje që drejtohen dhe zotërohen nga të huaj, dhe 9% prej tyre gjenden pikërisht në Toskanë, plot 53.578 të tilla, nga 419.900 që janë në total.
Më saktë, 12.9% e ndërmarrjeve në rajon zotërohen nga të huajt. Mesatarja italiane fiksohet në 9.4%.
Bëhet fjalë vetëm për sipërmarrës të huaj të cilët kanë lindur jashtë Italisë. Numri i sipërmarrjeve me pronar të huaj është rritur me një ritëm deri në 5% çdo vit. Vetëm në 2016-ën, rritja fiksohet në 3.4%.
Sa i përket origjinës së këtyre sipërmarrësve të huaj, në vend të parë janë kinezët, të ndjekur nga rumunët, me 13.400 dhe 8000 ndërmarrje respektivisht.
Në vend të tretë ndërkohë, qëndrojnë pikërisht shqiptarët. Në rajonin e Toskanës, ku ka edhe një përqendrim të lartë të emigrantëve shqiptarë, 7564 ndërmarrje zotërohen pikërisht nga shtetas shqiptarë.
Kjo do të thotë se, në këtë rajon, një në 3 kinezë ka në zotërim një ndërmarrje, ndërkohë që për shqiptarët ky raport fiksohet në 1 në 10.
Për të ilustruar se çdo të thotë kjo, mjafton të themi se në Shqipëri vetëm raporti i sipërmarrjeve me popullsinë fiksohet në 19 me 1, ndërkohë që për disa qarqe si Lezha shkon deri në 25 me 1.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.