BKH përzgjedh 28 hetuesit e parë – Përshëndet Ambasada e SHBA: Mbështetje të plotë SPAK kundër krimit e korrupsionit
BKH ka tashmë zyrtarisht 28 hetuesit e parë të cilët do t’i nënshtrohen trajnimit në Shtetet e Bashkuara të Amerikës. Sipas një njoftimi zyrtar, Komisioni i Posaçëm i Verifikimit të Pasurisë dhe Figurës në datë 1 prill, mbylli verifikimin e kushteve të sigurisë për kandidatët që konkurrojnë për “Hetues” në Byronë Kombëtare të Hetimit dhe ka vendosur që nga 37 kandidatë: 28 kandidatë kalojnë kushtet e sigurisë. ndërsa 9 kandidatë nuk i kalojnë kushtet e sigurisë. Kandidatët e kualifikuar do ti nënshtrohen trajnimit me një sërë modulesh vlerësimi që duhen kaluar përpara se të çertifikohen.
Verifikimi i kushteve të sigurisë u zhvillua nën vëzhgimin dhe monitorimin e Komisionit të Pavarur të Rishikimit, të caktuar nga misionet e Qeverisë së Shteteve të Bashkuara të Amerikës dhe Bashkimit Europian në Shqipëri. Në ditët në vijim do të hapet dhe procesi i rekrutimit për 32 (tridhjet e dy) pozicionet “Hetues”, të pa plotësuara. Njoftimi për hapjen e procesit të rekrutimit do të bëhet në website -in e BKH-së.
Përzgjedhja e 28 kandidatëve të parë, u përshëndet menjëherë nga Ambasada e Shteteve të Bashkuara në Tiranë. Urime dhe fat të mbarë burrave dhe grave që përfunduan me sukses procesin rigoroz të aplikimit dhe tani do të fillojnë trajnimin për Byronë Kombëtare të Hetimit, thekson ambasada në faqen e vet zyrtare. “Shtetet e Bashkuara të Amerikës do të vazhdojnë të mbështesin SPAK-un dhe ata që i përgjigjen thirrjes së detyrës për të luftuar korrupsionin dhe krimin e organizuar në emër të popullit shqiptar. Presim së shpejti një thirrje tjetër për hetues të BKH-së, për të forcuar më tej këtë institucion të ri!”, thekson deklarata. Më herët është bërë me dije se një pjesë e trajnimit të hetuesve të Byrosë Kombëtare të Hetimit do të zhvillohet pranë strukturave të FBI në shtetet e Bashkuara të Amerikës.
Lorenc Rabeta / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.