Bledi Çuçi informon mbi ecurinë e procesit të verifikimit dhe vlerësimit të dëmeve nëpërmjet procesit elektronik të të dhënave
Në vijim të punës për adresimin e dëmeve të shkaktuara nga tërmeti i 26 nëntorit, Drejtues Qendror i Operacionit për Menaxhimin e Fatkeqësisë Natyrore, Bledi Cuci ka informuar për ecurinë e procesit të verifikimit dhe vlerësimit të dëmeve në ndërtesat dhe banesat brenda perimetrit të zonës së prekur nga kjo fatkeqësi e natyrës.
Procesi i vlerësimit të dëmeve është organizuar në dy faza, në përputhje me praktikat standarde ndërkombëtare:
FAZA I. – VLERËSIMI FILLESTAR
Në fazën e parë është bërë vlerësimi urgjent dhe fillestar të dëmeve në ndërtesa. Ky vlerësim kishte për qëllim përcaktimin e ndërtesave dhe banesave që paraqesin rrezikshmëri, dhe të cilat duhen shembur ose duhen shpallur të pabanueshme përkohësisht, me synim parësor, garantimin e sigurisë së jetës së banorëve.
FAZA II. – VLERËSIMI I RAPORTIT PËRFUNDIMTAR
Kjo fazë ka synim kryesor përcaktimin e saktë të dëmeve në banesa dhe përllogaritjen e kostos së këtyre dëmeve.
Për këtë qëllim, të dhënat për vlerësimin e dëmtimeve në ndërtesa, në këtë fazë, janë duke u administruar nëpërmjet një formulari të standardizuar, të përgatitur mbi modelet e Bashkimit Europian, Bankës Botërore dhe Kombeve të Bashkuara, ku mbledhja e përpunimi i të dhënave bëhet në kohë reale në mënyrë elektronike.
Mbi 100 grupe inspektimi kanë verifikuar banesat e dëmtuara nga tërmeti në të gjithë qarqet Durrës, Tiranë e Lezhë. Në përbërje të këtyre grupeve janë angazhuar rreth 300 inxhinierë, përfshirë edhe ekspertë e konstruktorë të huaj.
Ndërkohë, Grupi i Verifikimit të FSHZH-së (Fondit Shqiptar të Zhvillimit), ka 9 grupe në terren dhe ka marrë si detyrë të verifikojë dëmet e tërmetit në Njësinë 5 në Durrës, në të cilën janë 7580 objekte, prej të cilave deri tani, janë verifikuar rreth 2000 ndërtesa. Çdo grup verifikimi përbëhet nga minimumi 2 inxhinierë.
Sipas njoftimit të bërë nga Çuçi, demonstrimi në kohë reale tregon se si funksionon në mënyrë të integruar, të centralizuar dhe sistematike procesi i elektronik i mbledhjes së të dhënave të verifikimit dhe vlerësimit të dëmeve të tërmetit nga grupet e verifikimit në terren dhe qendrës së përpunimit të të dhënave online.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.