Blegtoria shqiptare – Fermerët përmirësojnë racat dhe shkojnë drejt mjaltit

Blegtoria në Shqipëria ka marrë një kthesë pozitive gjatë viteve të fundit, duke marrë një karakter më sipërmarrës, për të shfrytëzuar më mirë potencialin e saj, si një nga sektorët më të rëndësishëm të bujqësisë.

Fokusi i fermerëve shqiptarë gjatë kësaj periudhe ka qenë ai i përmirësimit të racave përmes inseminimit artificial, si tek gjedhët, tek bagëtitë, ashtu edhe tek shpendët.

Kështu, bie në sy se numri i lopëve dhe pulave në vend kanë rënë gjatë tre viteve të fundit me përkatësisht 3 mijë dhe 1 milion e 855 mijë krerë, por prodhimi i qumështit të lopës është rritur ndërsa ai i vezëve ka mbetur konstant. Kjo nënkupton një rritje të eficiencës në të dyja rastet, me 2% tek lopët dhe me 38% tek pulat.

Në rastin e pulave kjo rritje e eficiencës mund të jetë edhe më e lartë, nëse llogarisim se është rritur edhe prodhimi i mishit të shpendëve, çka mund të nënkuptojë se shumë pula mbarështohen vetëm për mish.

Gjatë këtyre tre viteve ka patur një rritje edhe të krerëve të bagëtive, me mbi 1 milion krerë më shumë bagëti të imta, mbi 103 mijë bagëti të leshta dhe me 37 mijë bagëti të dhirta.

Si pasojë e këtij shtimi, Shqipëria ka prodhuar rreth 330 ton më shumë lesh dhe 1 mijë ton më shumë mish.

Por zhvillimi më i rëndësishëm gjatë kësaj periudhe ka qenë shtimi shumë i madh i numrit të koshereve të bletëve, të cilat në fund të vitit 2016 numërojnë 303 mijë koshere, krahasuar me 261 mijë koshere në vitin 2014.

Kjo e rritur edhe më tepër prodhimin e mjaltit, që është produkti blegtoral kryesor i shprehur në ton në vendin tonë. Mjalti i prodhuar është rritur me pothuajse 25%, ose rreth 923 ton më tepër, duke shkuar pranë sasisë së prodhuar nga Serbia.

Me një çmim mesatar të mjaltit prej 2500 dollarë/ton, prodhimi vjetor i Shqipërisë kap çmimin prej 9,8 milionë dollarë, nga 7,5 milionë dollarë. Sa i takon zonave me përqendrimin më të madh të mbarështimit të bletëve, mbizotërojnë Korça, 15%; Durrësi, 12.5%; si edhe zona juglindore e vendit.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.