Blerjet në industrinë e kimikateve – Gjiganti gjerman BASF blen biznesin e farave nga Bayer për 5.9 mld euro
Prodhuesi më i madh në botë i kimikateve, BASF, ka rënë dakord të blejë biznese të farave dhe herbicideve nga gjiganti tjetër gjerman, Bayer, për 5.9 miliardë euro në para cash’, ndërkohë që kjo e fundit po përpiqet të bindë autoritetet e konkurrencës që të miratojnë planet për blerjen e Monsanto.
Kompania blerëse, BASF, ka shmangur deri më tani aktivet që i përkasin farave dhe ka ndjekur hulumtimet në karakteristikat e bimëve, si rezistenca ndaj thatësirës, që e shet në formën e licencës ndaj prodhuesve e zhvilluesve të farave. Megjithatë, marrëveshja e Bayer për 66 miliardë dollarë për të blerë grupin amerikan të farave Monsanto, ka krijuar mundësi për rivalët që të këmbejnë aktivet, për të kënaqur autoritetet e konkurrencës.
Bayer kishte ofruar që të shesë aktive me vlerën e rreth 2.5 miliardë dollarëve. Komisioni Europian deklaroi në Gusht se kjo shitje nuk ishte e mjaftueshme dhe nisi një hetim ndaj marrëveshjes Bayer-Monsanto. Analistët thonë se vendimi i BASF për të blerë aktivet e Bayer përfaqëson një ndryshim të këndvështrimit të mëparshëm për të reaguar ndaj konsolidimeve të fundit në agrikulturë. BASF do ta financojë blerjen nëpërmjet një kombinimi të parasë cash’, letrave me vlerë tregtare e obligacioneve, dhe pret që blerja të kontribuojë te të ardhurat deri në vitin 2020.
Aksionet e Bayer u rritën me 1.3%, ndërsa BASF ra me 0.7%. Bizneset që Bayer po shet, gjeneruan të ardhura nga shitjet prej 1.3 miliardë euro në 2016-ën. Merill Lynch dhe Credit Suisse kanë vepruar si këshillues financiar ndaj Bayer.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.