Bletërritësit në Prizren japin alarmin: “Sëmundje të panjohura po na i mbytin bletët”
Një grup bletërritësish nga Prizreni janë ankuar pranë Drejtorisë së Bujqësisë, se sëmundje të panjohura po ua mbytin bletët, ndaj ata kanë kërkuar që Komuna e Prizrenit, por edhe Ministria përkatëse të parashikojë në buxhetin për vitin e ardhshëm, një fond të veçantë për mbrojtjen e shëndetit të bletëve.
Gazeta e Re raporton se rreth 50% e bletëve në Komunën e Prizrenit janë viktimë e një sëmundjeje të panjohur për ta, për të cilën nuk gjejnë ilaç, prandaj kanë kërkuar ndihmën e Komunës dhe të Qeverisë së Kosovës për angazhimin e ekspertëve nga jashtë.
Nexhat Kovaçi, u ankua se pas dimrit të fundit rreth gjysma e bletëve të tij kanë pësuar nga një sëmundje e panjohur. Nga analizat që janë bërë në Kosovë ai thotë se kanë dalë rezultatet, sipas të cilave bletët kanë pësuar nga një virus që sipas tij është prezent gjatë verës e jo në stinën e dimrit.
Ai duke mos iu besuar këtyre analizave kërkon ndihmë nga jashtë. “Janë tri sëmundje të bletëve që po dominojnë” tha ai
Bletërritësit gjithashtu janë ankuar se gjatë sezonit, në terrenet që ata i bëjnë gati për bletët e tyre vijnë bletërritës nga komunat e tjera. Ata pohuan se e kanë paraqitur rastin pranë organeve përgjegjëse, por nuk janë marrë masa.
Bletërritësit gjithashtu kanë kërkuar që të ndihmohen me fidanë për pyllëzimin e pjesëve të caktuara të pyjeve.
Ata kanë apeluar që ndihmat që ndahen për bletarët të bëhen në bashkëpunim me Shoqatat e bletërritësve që të përfitojnë ata që vërtetë kanë nevojë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.