Bllokohet sërish tenderi i unazës – Pas tenderit të ri të ARRSH-së, 2 kompani ankohen në KPP

Telashet për ndërtimin e lotit 1 të Unazës së Madhe, që u përfshi në skandalin e falsifikimit të dokumenteve nga kompania “DH Albania” nuk kanë të sosur. Pas miratimit të projektit të ri në Këshillin Teknik dhe hapjes së garës nga Autoriteti Rrugor Shqiptar në muajin qershor, 2 prej kompanive pjesëmarrëse në garë kanë depozituar ankesë pranë Komisionit të Prokurimit Publik, duke bllokuar procedurat tenderuese deri në një vendim të këtij të fundit.

Ankimimet janë depozituar nga operatorët ekonomikë Salillari dhe Alb Building, ndërkohë që referuar legjislacionit në fuqi do të jetë KPP që do të vendosë nëse do të pranojë ankesat e tyre, apo të lerë në fuqi vendimin e Autoritetit Rrugor Shqiptar për skualifikimin nga gara.  Vetëm pak ditë më parë Komisioni pranoi ankesën e një bashkimi operatorësh për aksin Kardhiq-Delvinë, duke i kërkuar ARRSH-së, kualifikimin e tyre, të cilët kishin paraqitur një ofertë 500 mln lekë më të ulët sesa oferta e shpallur fituese nga Autoriteti Rrugor. Projekti i ri për lotin 1 të Unazës parashikon heqjen e mbikalimit të parashikuar për t’u ndërtuar te sheshi Shqiponja, duke zëvendësua me një nënkalimi me korsi të dedikuara për autobusët, biçikletat, si dhe i jep një rëndësi të veçantë gjelbërimit.

Ndërkaq, pavarësisht ndryshimit të projektit, asgjë nuk ndryshon në drejtim të shpronësimit të banorëve që preken prej tij, të cilët vijojnë të kundërshtojnë prishjen e banesave të tyre.

Ola Mitre/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.