BOE, likuiditet për bankat edhe gjatë 2021 – Guvernatori Bailey: Përballemi me disa rreziqe, si pandemia dhe Brexit pa marrëveshje
Guvernatori i Bankës së Anglisë njoftoi se likuiditeti për bankat dhe kushtet e favorshme do të vijojnë edhe gjatë vitit 2021, për shkak të rreziqeve me të cilat përballet ekonomia britanike. Ndërkohë që Brexit mund të finalizohet pa një marrëveshje, një shqetësim tjetër është edhe pandemia e Covid-19.
Banka e Anglisë ka marrë masa për të vijuar me huamarrjen për bankat edhe në vitin 2021, pasi Britania përballet me rritjen e infektimeve me Covid-19 dhe me shumë mundësi nuk do të arrijë një marrëveshje tregtare me Bashkimin Europian. Guvernatori Andrew Bailey deklaroi se banka qëndrore ka bërë gjithçka është e mundur për të adresuar të gjithë rreziqet që mund të vijnë nga një Brexit pa marrëveshje deri më 31 dhjetor. “Banka e Anglisë ka bërë shumë në parandalimin e rreziqeve.
Në vijim do të përdorim të gjitha mjetet që kemi në dispozicion, ashtu sikurse bëmë në mars”, deklaroi Bailey në konferencën për mediat. Banka e Anglisë rriti likuditetin në tregjet financiare në fillim të pandemisë, uli normat e interesit në nivele rekord dhe nisi programin e blerjes së bonove. Çrregullimet në tregje nuk duhet të kërcënojnë stabilitetin financiar, por Bailey paralajmëroi se disa kategori të konsumatorëve europianë nuk do të kenë mundësi të aksesojnë shërbimet financiare britanike, pasi Bashkimi Europian nuk po ndërmerr veprime mbi emigracionin.
Kryeministri britanik, Boris Johnson deklaroi pas takimit me Ursula von der Leyen se ka mundësi të mëdha që periudha e tranzicionit të Brexit të përfundojë më 31 dhjetor, pa një marrëveshje tregtare, që nënkupton se do të aplikohen tarifa për eksportet britanike drejt Bashkimit Europian. Gjithsesi, Bailey shprehu besimin se Londra do të vijojë të jetë një ndër qendrat më të mëdha financiare në botë, ashtu sikurse ka qënë deri më tani.
Lidion Kulla / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.