Bonusi 2.5 milionë lekë – Mjekja e dytë specialiste pranon të largohet nga QSUT
Bonusit prej 2.5 milionë lekë i është përgjigjur edhe një mjeke tjetër. Kështu një kardiologe nga QSUT është zhvendosur për të punuar në spitalin rajonal të Beratit. Ministrja e Shëndetësisë dhe Mbrojtjes Sociale, Ogerta Manastirliu, u shpreh se po përdoren dy programe të rëndësishme për të zbutur mungesat me mjekë specialistë në spitalet rajonale, partonazhimi dhe bonusi.
Sipas Manastirliu, politikat incentivuese te qeverise siç është bonusi deri në 2.5 milion lekë plus pagën, për te nxitur mjeket te punojnë ne spitalet ku ka nevoja për specialiste, po japin rezultate.
“Ne po zbatojmë 2 programe shumë të rëndësishme për të plotësuar mungesat e mjekëve specialistë në spitalet rajonale, patronazhimin dhe bonusin, për ta sjelle shërbimin aty ku janë nevojat. Paralelisht po fuqizojmë spitalet rajonale me investime në infrastrukturë dhe aparatura mjekësore, për të garantuar shërbim me cilësi sa më afër vendbanimit të qytetarëve”, u shpreh Ministrja Manastirliu.
Pas spitalit të Kukësit dhe Beratit, nevojat me mjekë specialistë kanë nisur të plotësohen edhe në spitalin rajonal të Dibrës dhe Korçës ku po japin shërbim mjekë anestezistë për të cilët këto spitale kishin nevojë emergjente.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.