Bordet e reja në universitete – Nis përzgjedhja e kandidatëve. KM, paga maksimale 25 mijë lekë
Pas shkarkimit të anëtarëve të bordeve në institucionet e arsimit të lartë, si rezultat i protestës studentore ku një ndër kërkesat ishte edhe ajo për transparencën në manaxhimin financiar të IAL edhe përfaqësim të studentë, 12 universitetet shtetërore në Tiranë dhe në Rrethe do të kenë gati bordet e reja për administrimin e tyre në muajin mars. Këshilli i ministrave ka vendosur si afat të fundit për dorëzimin e emrave të kandidatëve për anëtarë të bordit nga ana e senateve akademike 26 shkurtin, duke vënë në dispozicion nga ana e ministrisë përgjegjëse një komision “Ad-Hoc” i cili për një afat 10 ditor do të bëjë përzgjedhjen e kandidatëve të propozuar nga institucionet e arsimit të lartë.
Ky vendim plotëson një prej kërkesave të studentëve pasi u jep mundësi këtyre të fundit të jenë të përfaqësuar por jo vetëm kaq ndryshe nga bordet që kanë administruar universitet deri më tani vota e studentit do të ketë një peshë më të madhe sa i takon përzgjedhjes së kandidatëve për dekanë dhe rektor.
Këshilli i Ministrave në vendimin e miratuar në fletoren zyrtare krahas kritereve të kandidatëve ka përcaktuar edhe masën e shpërblimit të tyre me një kufi maksimal prej 25 mijë lekësh në muaj.
Bordet e administrimit garantojnë qëndrueshmërinë financiare të universiteteve dhe përmbushjen e misionit të tyre. numri i anëtarëve në këto borde do të jetë 7 ku gjithashtu anëtarët nga ministria e arsimit pritet të jenë figura publike të propozuara nga studentët.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.