Borxhet ndaj OSHEE-së, 74.1 miliard lekë – Kryesojnë familjarët me 46 miliard lekë, ujësjellësit njohin vetëm përkeqësim

Totali i faturave të pashlyera ndaj Operatorit të Shpërndarjes së Energjisë Elektrike arriti në 74.1 mld lekë, në fund të muajit gusht të këtij viti. Sipas të dhënave të publikuara nga Enti Rregullator i Energjisë, pjesa më e madhe e borxhit i takon abonentëve familjarë, me rreth 46 mld lekë fatura të palikujduara, me një tendencë të lehtë në rënie gjatë muajve të fundit. Pas kësaj kategorie, janë institucionet  jobuxhetore që regjistrojnë borxhet më të larta, me 12.7 mld lekë.

Kryesisht te kjo kategori përfshihen ujësjellësit dhe klubet sportive, borxhet e të cilëve që prej muajit mars të vitit 2015 njohin vetëm rritje e nuk reflektojnë asnjë situatë përmirësimi.  Kjo pavarësishst ndryshimeve që i janë bërë metodologjisë së subvencionimit të tyre nga paratë e buxhetit të shtetit, që i detyron që një peshë specifike të fondit ta përdorin për shlyerjen e faturave të energjisë elektrike. Ndërkaq, pjesa tjetër e borxheve ndaj OSHEE-së, ndahet mes abonentëve privatë dhe institucioneve buxhetore.

Kështu, shuma e palikujduar nga ana e bizneseve arrin në rreth 11.5 mld lekë, duke mos pësuar asnjë pëmirësim apo përkeqësim që prej vitit 2015. Ndërkaq, institucionet buxhetore duket se janë më të rregulltët në drejtim të pagesave ndaj faturave të energjisë elektrike, teksa detyrimet e pashlyera u regjistruan në rreth 3.9 mld lekë deri në fund të 8-mujorit.

TABELË

FATURAT E PALIKUJDUARA NDAJ OSHEE-SË

Familjarë  46 mld lekë

Institucione jobuxhetore 12.7 mld lekë

Privatë 11.5 mld lekë

Institucione buxhetore 3.9 mld lekë

TOTALI 74.1 MLD LEKË

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.