Borxhi global, në nivel rekord – Arrin në $247 trln në tremujorin e parë, shqetëson tkurrja monetare
Sasia totale e borxhit e mbajtur nga vendet e zhvilluara dhe ato në zhvillim, e matur nga Instituti i Financave Ndërkombëtare, u rrit në një nivel rekord prej 247 trilionë dollarë në tremujorin e parë 2018, në rritje me 11.1% nga e njëjta periudhë një vit më parë.
Raporti i borxhit ndaj Produktit të Brendshëm Bruto i këtyre vendeve, që përfshin ekonomitë e grupit të G7 dhe shumicën e tregjeve në zhvillim, është rritur në 318%. Kjo është rritja e parë tremujore e borxhit ndaj PBB që prej tremujorit të tretë 2016.
“Ndërkohë që ekonomia globale ka humbur vrull dhe SHBA ka rritur normat e interesit në mënyrë të qëndrueshme, shqetësimet mbi rrezikun e kreditit janë rikthyer”, deklaron institucioni. Që prej Dhjetorit 2015, Rezerva Federale në SHBA ka rritur normat e interesit 7 herë dhe pritet të vazhdojë ciklin tkurrës.
Niveli i borxhit i ekonomive familjare, korporatave jo-financiare dhe sektorëve qeveritarë u rrit në 186 trilionë dollarë në tremujorin e parë të këtij viti. Borxhi i sektorit financiar arriti në një rekord prej 61 trilionë dollarë. Borxhi i lartë në sektorin jo financiar mund të jetë problematik, edhe pse nuk ka gjasa të sjellë një krizë të borxhit të ngjashme me dekadën e kaluar, sipas institucionit. Borxhi i tregjeve në zhvillim, arriti në 58.5 trilionë dollarë, në rritje me 2.5 trilionë në tremujorin e parë. Zotëruesit e borxhit me interesa të luhatshme përballen me rrezik më të madh për shkak të tkurrjes monetare në ekonomitë e zhvilluara.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.