Borxhi i brendshëm – Yeild-et, në nivelet më të ulëta historike

Qeveria shqiptare edhe këtë vit po përfiton nga epoka e normave të ulëta të interesit. Në fund të gjashtëmujorit të parë të këtij viti, interesi mesatar i borxhit të brendshëm zbriti në 4.39%, pranë niveleve më të ulëta të të gjitha kohërave.

Interesi mesatar i borxhit ka ardhur në rënie të vazhdueshme që prej vitit 2009, kur preku edhe nivelin më të lartë historik, me 8.95%. Rënia e interesave të borxhit është ndihmuar padyshim nga politika monetare lehtësuese, gjendja e lartë e likuiditetit në sistemin bankar, si edhe nga një ulje graduale e huamarrjes e brendshme. Për 6-mujorin e parë të vitit, qeveria shqiptare pagoi 10.7 miliardë lekë interesa për borxhin e brendshëm, 22% më pak krahasuar me 6-mujorin e parë të vitit të kaluar.

Ulja e interesave të borxhit favorizon edhe një proces tjetër që qeveria shqiptare ka ndërmarrë prej vitesh, atë të zgjatjes së maturitetit mesatar të borxhit publik. Maturiteti mesatar i letrave të borxhit të qeverisë në fund të qershorit arriti në 801 ditë, ndërkohë që në fund të vitit 2012 ishte rreth 360 ditë. Ulja e ndjeshme e interesit mesatar, duke zgjatur njëkohësisht maturitetin e borxhit, tregon se periudha e interesave të ulëta të huamarrjes është shfrytëzuar më së miri.

Zhvendosja e borxhit drejt afateve të gjata të maturimit ul rrezikun e rifinancimit, pasi kërkesa e investitorëve për bono dhe obligacione qeveritare mund të ndryshojë në periudha të ndryshme. Fakti që mbi 86% e stokut të letrave të borxhit janë me interesa fikse i jep mundësinë qeverisë të sigurojë interesa të qëndrueshme, pavarësisht nga luhatjet e tregjeve.

Rritja e maturitetit mesatar të borxhit të brendshëm është bërë në një periudhë të favorshme, duke arritur njëkohësisht zgjatjen e maturitetit të borxhit, por edhe uljen e interesit mesatar.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.