BP, investitori më i madh i huaj i Rusisë, braktis aksionet e saj në firmën energjetike të kontrolluar nga shteti!

Dalja e BP hap një front të ri në fushatën e Perëndimit kundër Rusisë

BP hapi një front të ri në fushatën e Perëndimit për të izoluar ekonominë e Rusisë duke vendosur të largohet nga investimet e saj në naftë dhe gaz në Rusi, lëvizja më agresive ende nga një kompani në përgjigje të pushtimit të Ukrainës nga Moska.

Aleatët perëndimorë kanë shtuar përpjekjet për të ndëshkuar Rusinë duke mbyllur hapësirën ajrore për avionët rusë, duke mbyllur disa banka nga rrjeti financiar SWIFT dhe duke kufizuar aftësinë e Moskës për të vendosur rezervat e saj valutore prej 630 miliardë dollarësh, të gjitha masat që pritet të dëmtojnë ekonominë.

Rubla ra deri në 30% në nivelin më të ulët të të gjitha kohërave kundrejt dollarit të hënën, duke bërë që banka qendrore të dyfishojë normën bazë të interesit në 20% për ta mbështetur atë.

BP, investitori më i madh i huaj i Rusisë, tha se po braktiste aksionet e saj në firmën energjetike të kontrolluar nga shteti Rosneft me një kosto deri në 25 miliardë dollarë, duke ulur në gjysmë rezervat e naftës dhe gazit të kompanisë britanike.

Lëvizja vë në qendër të vëmendjes firmat e tjera perëndimore që operojnë në Rusi, duke përfshirë rivalët e BP si TotalEnergies e Francës dhe Shell e Britanisë, mes presionit nga qeveritë për të shtrënguar vidhat financiare ndaj Moskës pasi ajo filloi sulmin më të madh ndaj një vendi europian që nga Lufta e Dytë Botërore.

Equinor, firma energjetike me shumicë në pronësi të shtetit norvegjez, tha të hënën se do të fillojë të heqë dorë nga sipërmarrjet e saj të përbashkëta në Rusi. Fondi sovran i pasurisë së Norvegjisë, më i madhi në botë, do të heqë gjithashtu asetet e tij ruse, me vlerë rreth 25 miliardë korona norvegjeze (2.8 miliardë dollarë).

Fondi i pasurisë sovrane i Australisë tha gjithashtu se planifikoi të mbyllte ekspozimin e tij ndaj kompanive të listuara në Rusi. RTS

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.