BQE dhe zgjedhjet franceze – Raundi i parë nuk ka gjasa të sjellë nisjen e tkurrjes monetare
Pasiguritë politike po fillojnë të zbehen në Eurozonë pas zgjedhjeve në Hollandë dhe së fundmi, raundit të parë të garës presidenciale në Francë.
Megjithatë, analistët thonë se situata politike në Europë është ende shqetësuese dhe se është shumë herët që Bankat Qendrore të nisin tkurrjen monetare.
Ekonomistët e Rabobank thonë se rezultati i zgjedhjeve në Francë i ka dhënë një shtysë spekulimeve se Banka Qendrore Europiane do të reduktojë blerjet mujore përpara afatit apo të nisë rritjen e normave të interesit.
Institucioni në Frankfurt do të zhvillojë takimin e radhës ditën e Enjte, por nuk ka ndonjë pritshmëri se do të ndërhyjë këtë herë.
Raundi i parë i zgjedhjeve në Francë ka përfunduar, por vendi duhet të zgjedhë ende midis kandidatit të qendrës Emmanuel Macron dhe kandidaten e ekstremit të djathtë, Marine Le Pen.
Analistët thonë se nuk ka gjasa që BQE të ndërmarrë ndonjë veprim ndërmjet dy raundeve të zgjedhjeve në Francë.
Edhe pse perspektiva politike po bëhet më e qartë dhe të dhënat ekonomike janë fuqizuar, analistët nuk presin shumë nga deklarata e Presidentit të institucionit Mario Draghi.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.