“BQE është vigjilente” – Draghi: Mund të vonohet rritja e normave të interesit
Presidenti i Bankës Qendrore Europiane, Mario Draghi, tha se institucioni mund të vonojë më tej rritjen e normave të interesit, ndërkohë që rreziqet mbi ekonominë janë shtuar. Banka Qendrore Europiane ndryshoi qasje më herët gjatë muajit dhe hoqi dorë nga normalizimi i politikave monetare, duke i dhënë bankave më shumë likuiditet dhe vonuar rritjen e normave të interesit. Draghi tha se ndërkohë që kërkesa e jashtme ka rënë, investimet e bizneseve janë ngadalësuar dhe janë shtuar rreziqet që kërkesa e brendshme dhe punësimi të ndikohen gjithashtu.
Kreditë drejt bankave tregtare, apo operacionet afat-gjata të rifinancimit, janë një ndër mjetet që institucioni në Frankfurt mund të përdorë për të trajtuar ngadalësimin. “Këto operacione kanë disa parametra që mund të kalibrohen për të përmbushur politikat monetare në çdo kohë”, tha Peter Praet, krye ekonomisti i institucionit. Duke i’u përgjigjur ankesave të bankave se normat negative të interesit po dëmtojnë përfitueshmërinë, Draghi tha se Banka Qendrore Europiane do të vlerësojë nëse duhen marrë masa dhe shtoi se fitimet e ulëta nuk lidhen në mënyrë direkte me interesat negative.
Disa banka në Europën Veriore kanë kërkuar një normë të interesit për depozitat me disa nivele (multi-tier), që do t’i mbronte këto nga kostot ekstra të mbajtjes së likuiditetit të tepërt. Ndërkohë që norma e interesit për depozitat qëndron në -0.4%, Banka Qendrore Europiane mbledh mbi 7 miliardë euro çdo vit për mbajtjen e likuditetit të tepërt te bankat dytësore.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.