BQE në gatishmëri, Nowotny: Likuiditet për bankat franceze nëse do të jetë e nevojshme

Banka Qendrore Europiane do të ofrojë para cash bankave tregtare nëse votimi në Francë trazon tregjet financiarë, megjithatë, frenimi i kostove të huamarrjes së Qeverive do të ishte përtej mandatit.

Investitorët shqetësohen se nëse 2 kandidatët euroskeptikë, Marine Le Pen dhe Jean-Luc Melenchon, dalin në garë pas votimit të ditës se Dielë, e ardhmja e Francës në Eurozonë dhe mbijetesa e vetë euros do të vihej nën dyshim. Kjo do të sillte tërheqjen e shpejtë të depozitave dhe rritjen e kostove të huamarrjes, për Qeveri që kanë barrë të madhe të borxhit si Italia, gjë që ndodhi në krizën e viteve 2010-2012.

Guvernatori i Bankës së Italisë, Ignazio Visco tha në takimin e Fondit Monetar Ndërkombëtar dhe Bankës Botërore, se problemi qëndron te diferenca e yieldeve mes vendeve anëtare, gjë që kalon aftësitë e ndërhyrjeve monetare. BQE është drejt përfundimit të programit të blerjeve të titujve të borxhit prej 2.3 trilionë euro, por ndalohet nga traktatet europiane që të financojë në mënyrë direkte qeveritë.

Guvernatori i Bankës së Austrisë, Ewald Nowotny, tha se BQE është gati të ofrojë për huadhënësit ndihmë emergjente me likuiditet (ELA), diçka që është përdorur me sektorin bankar të Greqisë, megjithatë shtoi se mund të mos jetë e nevojshme. Bankat franceze kanë aktualisht më shumë cash se sa i nevojiten. Të dhënat e BQE tregojnë se ato kanë 174 miliardë euro shtesë ndaj rezervave të detyrueshme te institucioni në Frankfurt.

Klevis Llaha/SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.