BQE vendos në Tetor – Pritet të njoftojë reduktimin e lehtësimit sasior
Banka Qendrore Europiane me shumë gjasa do të njoftojë reduktimin e programit mujor të blerjes së titujve në muajin Tetor të këtij viti. Të paktën këtë pret pjesa dërrmuese e ekspertëve dhe analistëve.
Këta të fundit presin gjithashtu që, institucioni me bazë në Frankfurt të mbyllë plotësisht programin brenda fundit të vitit të ardhshëm. Pritshmëritë për një tërheqje të bankës nga programi i stimujve marrin shtysë nga rritja e fortë ekonomike në rajon, të dhënat më të fundit të inflacionit si dhe tregu i punës, në përmirësim të ndjeshëm.
Banka Qendrore Europiane e ka mohuar deri më tani që të ketë filluar debatin mbi këtë çështje, pavarësisht presionit të lartë, por ka sinjalizuar se diçka e tillë do të vinte në muajt e vjeshtës.
Eurozona po njeh rritjen më të fortë ekonomike në një dekadë, por inflacioni vijon të zhgënjejë. Gjatë Gushtit u ngjit në 1.5%, por pavarësisht kësaj, mbetet ende larg objektivit të bankës, pranë dhe më poshtë se 2%.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.