Braktisja e kafshëve, Organizatat: Krahas ligjit duhet sensibilizim – Për strehimin nevojitet shtimi i kapaciteteve grumbulluese dhe fondeve
Prej datës 11 tetor është depozituar në Kuvend i ashtuquajturi 1ligj4putra, paketa e ndryshimeve ligjore në Kodin Penal që propozon ndëshkimin e dhunës ndaj kafshëve.
Në ligj shtrohen si vepra penale keqtrajtimi, plagosja, torturimi i kafshëve, robërimi, kryerja e eksperimenteve, e deri tek ndeshjet mes kafshëve. Për të gjitha këto shkelje, parashikohen masa nga 20 mijë lekë gjobë e deri në 3 vjet burgim.
Të kontaktuar nga SCAN, disa prej organizatave e grupimeve vullnetare që merren me mbrojtjen dhe strehimin e kafshëve, shprehen të kënaqura nga propozimi në Kuvend, por thonë se ligji duhet shoqëruar nga bashkëpunimi ndërinstitucional
“Duhet që të gjithë aktorët: ministritë, bashkitë, drejtori bujqësie, policia, organizata, qytetarë të edukohen dhe të bashkëveprojnë. Nuk ka vlerë ligji, nëse unë denoncoj një njeri që vret qenin e tij, apo ata që organizojnë ndeshje me pitbull, dhe polici më qesh në surrat”, shprehet Oli Pero nga Shoqata “Animals Need Me”.
Braktisja dhe adoptimi
Posted by Animals Need Me on Saturday, September 23, 2017
Krahas masave për keqtrajtimin, ligji i ri prezanton si kundravajtje penale edhe braktisjen e kafshëve, veprim i cili dënohet me gjobë nga 10 mijë deri në 30 mijë lekë. Pikërisht kjo pikë, në rast miratimi të ligjit në Parlament, do të ndihmonte të gjitha këto shoqata në realizimin e objektivit të tyre parësor, adoptimin e kafshëve.
“Për të thënë të vërtetën, ligji do na e lehtësojë shumë procesin e adoptimit, se deri më tani na ka marrë shumë kohë ky proces nga pasiguria jonë se mos një dite do na i braktisin kafshët që iu japim. Dhe kjo na ka bere t’i hymë në çështje familjare, private, dhe duke parë nga ana psikologjike.
Ndryshe do të ishte nëse ai/ajo që do adoptonte një kafshe pas firmosjes së formularit do të mbante përgjegjësi ligjore për të”, thotë Eva Xhediku nga grupimi “Të bashkuar për kafshët Shqipëri”.
Por krahas qytetarëve që dalin vullnetarë për të adoptuar një kafshë, ligji do ta ketë të vështirë të identifikojë pronarët e mëparshëm.
“Në të shumtën e rasteve pronari nuk është i identifikueshëm, por kemi patur nganjëherë mundësi t’i gjejmë nëpërmjet veterinerëve që i kanë trajtuar më parë qentë ose macet, raste të pendesës, apo braktisje në derë të strehës, në kazanët e mbeturinave, a në dyert e vullnetarëve”, shprehet “Animals Need Me”
Sipas të dhënave të kësaj organizate, në 5 vitet e fundit ajo ka trajtuar rreth 1500 raste të qenve dhe maceve pa pronarë. Nga këto kafshë, gati 1/3 ose 450 janë braktisur nga pronarët, të pasterilizuar, çka bën që kur dalin në rrugë të shumohen.
“Janë vetë qytetarët shkaku kryesor i kafshëve endacake”, thotë organizata.
Nga qentë që jepen për strehim, njerëzit preferojnë ata që janë racë e pastër, pavarësisht moshës dhe adoptimet shkojnë në 100% të rasteve. Ndërsa për pjesën tjetër të qenve, shansin më të mirë për adoptim e kanë këlyshët, në 95% të rasteve.
Për qentë endacakë rastet e suksesshme janë vetëm 1 në 10, çka sjell nevojën për mbajtjen e tyre në streha. Me miratimin e ligjit, gjasat janë që më tepër qytetarë t’u drejtohen këtyre qendrave për gjetjen e një shtëpie të dytë për kafshët e tyre.
Welcome to our shelter!Italian and english below:Mirësevini në shelterin e Animals Need Me!🐶🐕😍Ky që shihni në foto, ë…
Posted by Animals Need Me on Thursday, September 28, 2017
“Asnjë grupim vullnetar apo organizatë në Shqipëri nuk i ka kapacitetet aktualisht për të mbledhur të gjithë qentë apo macet që një pronar mund të braktisë”, na informon Pero. Këtë e konfirmon edhe Xhediku nga “Të bashkuar për kafshët Shqipëri”.
“Kapacitetet nuk mjaftojnë, sepse nuk marrim ndihma as nga shteti as nga individët. Janë një grup vullnetarësh të bashkuar që kontribuojnë çdo muaj për kafshët. Patjetër që kemi nevojë për fonde dhe kryesorja për një strehë, një territor të cilin e pretendojmë pa pagesë për qëllime jofitimprurëse”, thotë Xhediku.
Në funksion të ndërgjegjësimit të qytetarëve, grupime të ndryshme të krijuara vitet e fundit, krahas veprimtarisë bazë janë angazhuar edhe në fushata informuese nëpër shkolla dhe media, por edhe në sterilizime masive për të ndihmuar në uljen e numrit të kafshëve endacake.
Angelo Haruni/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.