Brazili miraton AstraZeneca – Vaksina do të prodhohet në vend nga instituti biomjekësor Fiocruz
Rregullatori shëndetësor i Brazilit, Anvisa, u shpreh se ka dhënë miratimin përfundimtar për vaksinën AstraZeneca ndaj Covid-19, të zhvilluar me Universitetin e Oksfordit, e cila do të prodhohet në vend nga instituti biomjekësor Fiocruz.
Vaksina AstraZeneca tashmë po administrohet në Brazil, por është regjistruar vetëm për përdorim emergjent dhe dozat janë importuar nga India.
Në një deklaratë për mediat, drejtori i Anvisa, Gustavo Mendes, tha se dozat e prodhuara nga Fiocruz pritet të dorëzohen në Ministrinë e Shëndetësisë gjatë këtij muaji.
Përballur me një rritje të mprehtë të rasteve COVID-19 dhe vdekjeve rekord, qeveria braziliane po përpiqet të përshpejtojë vaksinimet, pasi sistemi shëndetësor në të gjithë vendin është afër një kolapsi.
Brazili ka porositur më shumë se 200 milion doza të vaksinës së Astra Zeneca dhe Sinovac, ndërsa tërhiqej dukshëm nga prodhimet e tjera. Presidenti Bolsonaro u shpreh ndërkaq se Brazili do të ketë në dispozicion 400 milion doza vaksinash deri në fund të vitit.
Mendes tha gjithashtu se Anvisa pret të marrë rezultatet e testit nga AstraZeneca mbi efikasitetin e vaksinës së saj kundër varianteve të reja të virusit, deri në Qershor.
Studimet paraprake sugjerojnë se vaksina AstraZeneca do të arrijë të sigurojë mbrojtje nga varianti i ri duke konfirmuar kështu edhe një raport të Reuters pak ditë më parë.
Mendes tha se ai nuk sheh asnjë pengesë për të miratuar vaksinën e zhvilluar nga Moderna sapo Anvisa të marrë një kërkesë zyrtare për regjistrim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.