Brazili në industrinë hapësinore – Treg $300 mld, kërkon të rivalizojë Shtetet e Bashkuara të Amerikës
Brazili është gati të hyjë në tregun e transportit hapësinor, deklaron autoriteti i forcave ajrore të vendit. Vendi i Amerikës latine ka hapur kështu dyert për kompanitë e vogla amerikane që duan të lëshojnë satelitë të vegjël në hapësirë me një kosto padiskutim më të ulët se tjetërkund. Kjo lëvizje vjen pas marrëveshjes së muajit të kaluar për hapësirën, gjatë vizitës në Brazilia të sekretarit amerikan të mbrojtjes, James Mattis.
Marrëveshja parashikon ndarjen në kohë reale të informacioneve dhe sidomos gjurmimit të objekteve në hapësirë. Kjo marrëveshje është thelbësore për të krijuar një biznes të mirëfilltë të lëshimit të satelitëve në hapësirë pa rrezikuar përplasje. Vendodhja e bazës braziliane të hapësirës, më pranë ekuatorit, bën që vetëm kostot e karburantit të shkurtohen me të paktën 1/3.
Brazili kërkon kështu të bëhet një portë e re në industrinë hapësinore, që vlen 300 miliardë dollarë aktualisht. Mes dy shteteve mungon edhe një marrëveshje tjetër, pa të cilën, asnjë satelit apo raketë amerikane nuk mund të lëshohet nga Brazili. Washingtoni zyrtar e shikon jetë marrëveshje si një mundësi mjaft të mirë për të thelluar bashkëpunimin mes palëve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.