Brazili “zhytet” në kaos – Protesta masive kundër reformës së pensioneve

Në Brazil kanë shpërthyer protesta dhe greva mbarëkombëtare. Protestuesit kanë dalë nëpër rrugë, duke kundërshtuar reformën e Presidentit Temer në pensione dhe tregun e punës.

Kjo reformë, që ka kaluar në dhomën e ulët të parlamentit, do të marrë miratimin përfundimtar të senatit brenda javës. Protestat janë organizuar nga sindikatat dhe unionet e punës.

Punonjësit në sektorin e transporteve, arsimit dhe atë bankar morën të gjithë pjesë në një grevë kombëtare të përgjithshme, duke paralizuar thuajse tërësisht jetën publike të Brazilit.

Rrugët, stacionet e trenit, aeroportet dhe shkollat u mbyllën plotësisht ditën e premte. Në Rio De Janeiro qëndruan të mbyllura edhe dyqanet e bankat.

Dhjetëra mijëra policë ndërkohë ishin në gatishmëri për të parandaluar dëme masive nëpër vitrinat e dyqaneve.

Përplasjet mes protestuesëve dhe policisë rezultuan të dhunshme, duke shkaktuar një kaos masiv në Rio de Janeiro. Reforma në pensione, parashikon shtyrjen e moshës së pensionit si dhe ndryshimin e metodës së përllogaritjes së kontributeve.

“Këto reforma vendosin një barrë të rëndë mbi popullin e zakonshëm, sidomos ndaj popullit të varfër. Kriza ekonomike është globale por duhet të ketë nëj rrugëdalje nga kjo situatë financiare, dhe nuk duhen lënë njerëzit e zakonshëm që të paguajnë për të”-shprehet një protestues.

Sistemi i pensioneve në Brazil njihet si një ndër më të favorshmit në Botë, por problemet demografike, me plakjen e shpejtë të popullsisë dhe problemet financiare kanë detyruar qeverinë të shtrëngojë disi dorën.

Roel Korkuti/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.