Brenti i Londrës ngjitet në 123 dolalrë – Europa mund të përballet me mungesë të energjisë dimrin e ardhshëm

Çmimet e naftës po karakterizohen nga qëndrueshmëria në sesionin e sotëm, por një ditë më parë Brenti i Londrës u ngjit deri në 123 dollarë për fuçi, që është niveli më i lartë në 13 javët e fundit. Nafta po mbështetet nga rritja e kërkesës dhe nga furnizimi i ulët i tregut.

Nafta Brent e Londrës po tregtohet në mbi 123 dollarë për fuçi, ndërsa nafta Bruto amerikane po tregtohet në rreth 122 dollarë për fuçi. Referuar të dhënave jozyrtare në SHBA, rezervat e naftës bruto regjistruan një rritje surprizë gjatë javës së kaluar.

Gjithashtu, edhe lehtësimi i masave kufizuese në Kinë, si pasojë e Covid-19 po mbështet çmimet e naftës. Në krahun e ofertës, tregtarët kanë shprehur shqetësime se disa vende mund të përballen me probleme në rritjen e prodhimit.

Në Norvegji, punonjësit e këtij sektori kanë planifikuar një grevë për pagat, duke filluar nga 12 qershori. Presioni në treg është rritur edhe më shumë pasi Irani hoqi dy kamera mbikëqyrje të Agjencisë Ndërkombëtare të Energjisë Bërthamore. Kjo lëvizje me shumë mundësi do të rrisë tensionet me Kombet e Bashkuara, me Shtetet e Bashkuara të Amerikës dhe me vendet negociatore.

Në kohët e fundit ishin rritur shpresat se do të kishte një marrëveshje dhe tregun do t’i shtoheshin rreth 1 milion fuçi naftë në ditë nga Irani. Ndërkohë, Agjencia Ndërkombëtare e Energjisë paralajmëroi se Europa, që vendosi sanksione ndaj naftës ruse, për shkak të pushtimit të Ukrainës, mund të përballet me ndërprerje të energjisë dimrin e ardhshëm.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.