Brexit godet industrinë e birrës – Zhvlerësimi i paundit bën që britanikët në Spanjë të shpenzojnë më pak
Rënia e paundit britanik ka bërë që turistët anglezë të jenë më të ndjeshëm ndaj çmimeve, duke i detyruar të zgjedhin destinacione më të lira, si: Turqia, Egjipti apo Tunizia.
Kjo ka bërë që numri i turistëve britanikë në Spanjë të bjerë ndjeshëm, dhe fajin e ka Brexit. Këta të fundit kontribuojnë me 12% në Prodhimin e Brendshëm Bruto të vendit.
Në 2018 ishin 18.5 milionë britanikët që vizituan vendin. Rënia e turistëve sjell probleme të mëdha për ekonominë spanjolle. Indiustria e birrës është një ndër ato që e vuan më shumë një gjë të tillë.
Turistët britanikë por edhe ata nga vende të tjera konsumojnë 25% të birrës së prodhuar në vit në Spanjë. Rënia e paundit dëmton rëndë fuqinë e tyre blerëse në Spanjë, shprehen aktorët kryesorë të kësaj industrie, duke shtuar se kjo gjë mund të përkeqësohet më tej në rast se do të kemi një brexit pa marrëveshje.
Paundi britanik ka rënë më 16% ndaj euros, që prej votës pro brexit në Qershor të 2016-ës, duke prekur nivelin më të ulët në një dekadë, këtë muaj. Të dhënat paraprake tregojnë se në muajin e parë të sezonit veror, numri i turistëve britanikë në vend ka rënë me 5.3% krahasuar me një vit më parë.
Në total, numri i turistëve në Spanjë është rritur, paçka se jo me ritmet dyshifrore të mëparshme. Por nuk është Brexit shkaktari i vetëm i kësaj situate, pasi falimentimi i linjës ajrore “Germania”, ka bërë që turistët të jenë më të paktë, e po ashtu ka ndikuar edhe konkurrenca e vendeve mesdhetare.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.