Brexit hyn në “skenë” – Ekonomia britanike ngadalësohet, shenjat e para të krizës
Ekonomia britanike regjistron performancën më të dobët në një vit, duke u ngadalësuar ndjeshëm gjatë tremujorit të parë të vitit, në një rritje prej vetëm 0.3%, ndërkohë që në tremujorin paraardhës rritej me 0.7%.
Të dhënat zyrtare të publikuara nga zyra e statistikave në vend rezultojnë edhe nën pritshmëritë e tregjeve, që flisnin për një normë pranë 0.4%. Performanca e dobët merr shtysë nga sektori i shërbimeve, që u rrit me vetëm 0.3% gjatë kësaj periudhe kohore, e që është norma më e ulët që prej muajve të parë të vitit 2015. Sektori i shërbimeve ka ndierë impaktin e përkeqësimit të standardeve të jetesës, dhe kryesisht rritjes së çmimeve.
Konsumatorët dhe bizneset po përballen me një periudhë pasigurie, të nxitur nga Brexit. Tashmë që vendi do t`i drejtohet zgjedhjeve të përgjithshme, kjo pasiguri pritet të shtohet edhe më tej, duke përkeqësuar ndjeshëm performancën ekonomike të Mbretërisë.
Sektori i shërbimeve zë 79% të ekonomisë britanike dhe ngadalësimi i hapit të rritjes, nga 0.8% në 0.3% ka gjeneruar shifrën aspak pozitive për tremujorin e parë të vitit.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.