Brexit, më i pasigurt se kurrë! – Nuk ka votim të tretë. Kryetari i parlamentit përjashton mundësinë

Kryetari i Dhomës së Ulët të Parlamentit britanik, John Bercow, përjashtoi mundësinë e një votimi të tretë të marrëveshjes së Theresa May, duke shtuar pasiguritë mbi procesin e Brexit. Në përpjekjen e parë në Parlament gjatë muajit Janar, marrëveshja e Brexit u refuzua me 230 vota, që është mposhtja më e madhe në histori.  Në votimin e dytë më 12 Mars, paketa u mposht me një rezultat më të ulët prej 149 votash.

Theresa May synonte për një votim të tretë të Martën apo të Mërkurën, përpara takimit të liderëve të Bashkimit Europian më vonë gjatë Javës. Sipas planit,  nëse marrëveshja do të kalonte këtë herë në parlament,  Kryeministrja do të kërkonte për një zgjatje të afatit të daljes nga Bashkimi Europian deri më 30 Qershor, që të mundësohej përfundimi i procesit ligjor.

Duke përmendur konventa parlamentare të hershme, Bercow tha se vetëm një marrëveshje e ndryshuar mund të prezantohet në parlament, gjë që përjashton mundësinë e një votimi të tretë përpara samitit të Këshillit Europian ditën e Enjte.  Theresa May pritet që t’i shkruajë presidentit të Këshillit Donald Tusk, për t’i kërkuar zgjatjen e Nenit të 50 të traktatit të Lisbonës, procesi që caktoi daljen fillestare të Britanisë më 29 Mars.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.