Brexit, shans për Shqipërinë? Pas daljes, britanikët mund ta zgjedhin për pushime
Pas Marsit të vitit 2019, shtetasve britanikë mund t`iu duhet të aplikojnë për vizë për të udhëtuar drejt vendeve të Bashkimit Europian, madje edhe të paguajnë për të marrë vizën.
Pagesa mund të jetë edhe prej vetëm 5 eurosh, por që shoqërohet me një procedurë burokratike. Çdo gjë varet nga negociatat mes Londrës dhe Brukselit, por kufizimi i lëvizjes është skenari më i keq i mundshëm për britanikët.
Megjithatë, duket se ka nga ata që mund të përfitojnë nga kjo situatë. Ekspertë britanikë dhe përfaqësues të transportit ajror apo dhe agjencive turistike, shprehen se, diçka e tillë mund të detyrojë britanikët të devijojnë vendet e Shengenit pas Marsit të 2019-ës, duke zgjedhur Malin e Zi, Shqipërinë dhe Serbinë.
Pavarësisht se, Britania nuk ka qenë asnjëherë pjesë e zonës Shengen, të qenit pjesë e Bashkimit Europian i ka dhënë shumë lehtësi udhëtarëve britanikë, të cilët deri më tani kanë lëvizur lirisht brenda unionit.
Pjesa dërrmuese e britanikëve, në këtë skenar do të duhet të aplikonte për vizë në kontinent përpara udhëtimit. Aktualisht, britanikët zgjedhin vendet europiane për pushimet e tyre, kryesisht Spanjën, duke përfituar nga mungesa e barrierave kufitare, e shumë përfitime të tjera që burojnë nga të qënit anëtar i së njëjtës familje.
Pas Brexit, shumë nga këto përfitime do të zhduken. Ted Wake, drejtor i “Kirker Holidays”, një prej agjencive më të mëdha të udhëtimeve në Britani, pasi tha se, britanikët mund të devijojnë udhëtimet e tyre drejt Shqipërisë, Malit të Zi dhe Serbisë, nënvizoi gjithashtu se, ata presin që, vendet më simpatike të fitojnë edhe pjesën dërrmuese të pushuesve, sidomos ata për pushime të shkurtra.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.