“Brexit” shtyhet përtej tetorit! Palët, nën presionin e kohës për të arritur një marrëveshje
Mbretëria e Bashkuar dhe Bashkimi Europian vijojnë të këmbëngulin se dëshirojnë një marrëveshje për Brexit brenda afatit të përcaktuar, që është muaji tetor. Por, prapa skenës, zyrtarët më të lartë nga të dyja palët e pranojnë se kjo nuk ka gjasa të ndodhë. Për këtë arsye, palët synojnë të finalizojnë kushtet e divorcit deri në mes të muajit nëntor, sipas disa burimeve të afërta me zyrtarët e Britanisë dhe BE-së.
Shtyrja e afatit kohor është një tregues tjetër se negociatorët po përpiqen të bëjnë përparime, ndërkohë që po afron data e daljes, që është 29 marsi, dhe po shtohet rreziku që të mos ketë një marrëveshje. Samiti i 18 tetorit i Bashkimit Europian ishte caktuar si afati i fundit për një marrëveshje. Shtyrja e afatit në nëntor, nënkupton se BE-ja do të zhvillojë një tjetër samit në po këtë muaj.
Megjithatë, një takim mes liderëve europianë, duke përfshirë kancelaren gjermane, Angela Merkel, presidentin e BE, Donald Tusk dhe negociatorin e bllokut për Brexit, Michel Barnier, që do të zhvillohet në Helsinki në fillim të nëntorit mund të ofrojë një mundësi të rëndësishme për të vlerësuar situatën.
Qëndrim i bashkuar përballë Trump
Ekipi i kryeministres së Britanisë së Madhe, Theresa May, gjithashtu beson se BE-ja dëshiron të arrijë një marrëveshje për Brexit, në mënyrë që të formojnë një front të bashkuar me Britaninë, kur liderët të takohen me presidentin amerikan, Donald Trump, në samitin e G20 në fund të nëntorit. Nëse afati shtyhet përsëri për në dhjetor ose janar, palët do të përballen me zgjedhje të rrezikshme; të lëshojnë terren apo të heqin dorë nga bisedimet. Tema më e vështirë e diskutimeve është kufiri i ardhshëm i Mbretërisë së Bashkuar me Irlandën e Veriut dhe Republikën e Irlandës.
Megjithatë, zyrtarët britanikë këmbëngulin se janë të sigurt në arritjen e një marrëveshjeje. “Ne po punojmë për të arritur një marrëveshje deri në tetor,” deklaroi përpara gazetarëve Greg Swift, zëdhënës i Theresa May. “Palët kanë rënë dakord të shpejtojnë hapin e negociatave. Kjo është ajo që po bëjmë,” shtoi ai. Edhe i ngarkuari i Bashkimit Europian për negociatat e Brexit, Michel Barnier, shprehu besimin se mund të ketë marrëveshje përpara fundit të vitit.
Por, në anën tjetër, e përditshmja “The Guardian” raportoi se i ngarkuari i Britanisë për Brexit, Dominic Raab, ka shprehur shqetësime për mungesën e disponueshmërisë së Barnier për negociata, pavarësisht premtimit të francezit për të qenë në dispozicion “24-7.” Edhe diplomatët e Mbretërisë së Bashkuar janë ankuar se, premtimi i Barnier për të qenë në dispozicion të bisedimeve të nivelit të lartë në çdo moment, ka rezultuan një “hiperbolë.”
Arritja e marrëveshjes së divorcit në vjeshtë shihet si jetike për t’u dhënë kohë të mjaftueshme parlamenteve britanike dhe europiane që të ratifikojnë marrëveshjen, përpara se Britania të largohet ligjërisht nga blloku. Por, mungesa e përparimit ka ndikuar negativisht edhe në ecurinë e paundit, për shkak të paralajmërimeve të zyrtarëve të lartë se Britania rrezikon shumë, nëse del nga Bashkimi Europian pa një marrëveshje.
Lidion Kulla/SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.